د اسلامي امارت له واکمنېدو راهیسې په ځلونو متقاعدینو د پلازمېنې کابل په ګډون په یو شمېر ولایتونو کې د اعتراضیه غونډو په ترڅ کې د خپل تقاعد غوښتنه کړې.
تازه یو ځل بیا د تقاعد ریاست مخې ته را ټول شوي متقاعدین د خپلو حقونو د نه ورکړې له امله را ټول شوي او له سرپرست حکومته غوښتنه کوي، چې دغه حق دې وکړي.
یو تن متقاعد محمد عیسی وايي: « دوی باید زموږ غږ واوري او لبیک ورته ووايي، پر موږ شفقت او مهرباني وکړي. زموږ په اولاد زړه وسوزوي، ژمی راروان دی، موږ له ډېرو ستونزو سره مخ یو. زموږ د متقاعدینو د معاش د ورکړې په برخه کې دې مسوولین د تقاعد ریاست او د مالیې وزارت ته دنده ورکړي.»
د یوه متقاعد مېرمن مرحمه وايي: « زه له اسلامي امارته غواړم چې زما د خاوند تقاعد دې ماته راکړي، چې زما ستونزې هوارې شي. زه خرڅ خوراک ته ورسېږم، ناروغۍ ته ورسېږم، د کور کرایه ورکړم، لرګي واخلم کومه خوا را ونیسم. بیګا یې چې خورم سبا ته حېرانه یم او سبا یې چې خورم بېګا ته حېرانه یم، زه څه ته ورسېږم. د کار هېڅوک نه لرم خاوند مې و په حق ورسېده، په همدې تقاعد یې موږ خپلې شپې او ورځې تېرولې.»
دغه متقاعدین وایي، اقتصادي ستونزې یې اوج ته رسېدلي او ان ځینې د سړک په سر سوال کولو ته اړ شوي.
دوی وایي، په تېرو ۴۰ کلونو کې یې د خپل هېواد لپاره خدمت کړی او په خبره یې دا یې خپل قانوني حق دی چې باید تر لاسه یې کړي.
یو تن متقاعد شاه وزیر وايي: « اوس چې خدای دا نظام موږ ته راکړی موږ یې باید قدر او عزت وکړو خو له اسلامي امارته زموږ دا غوښتنه ده چې له موږ سره دې د مور او مېرې چلن نه کوي. موږ له دوی کوم خیرات یا صدقه نه غواړو، موږ ته دې خپل حق چې تقاعد دی راکړي او دا زموږ له خپل معاش ګرځېدلې پیسې دي.»
یو بل متقاعد عبدالجلیل مرادي وايي: « موږ همدې خاورې او هېواد ته خدمت کړی، له بهره نه یو راغلي، موږ خپل قانوني حق غواړو. دا متقاعدین درې کاله کېږي چې خپل حق غواړي؛ خو تراوسه توشیح شوی نه دی، ۱۱ میاشتې وشوې چې وايي مقرره کندهار ته تللې خو تراوسه نه ده توشیح شوې.»
د حقوقي چارو کارپوهان ستونزو ته په کتو دا د هر حکومت مسوولیت ګڼي، چې د متقاعدینو حقوق ورکړي.
دوی له سرپرست حکومته غواړي، چې د متقاعدینو حقوق ژر تر ژره ورکړي.
د حقوقي چارو شنونکی اسماعیل ځدراڼ وايي: « زه وایم چې تقاعد د دې خلکو حق دی او باید ور یې کړي، ځکه دولتونه به ځي راځي، دا که نه وي نو د دوی کسانو ته به بیا راتلونکی حکومت تقاعد نه ورکوي. د اسلامي امارت په مشرانو غږ کوو چې دې خلکو ته خپلې پیسې چې تقاعد دی باید ورکړل شي. که بودیجه نه لري نو بیا دې په داسې پلان کار وکړي چې له مخې یې په دوو یا درېیو پړاوونو کې دوې ته خپل حق ورکړي.»
که څه هم دغه موضوع مو د اسلامي امارت له مسوولینو شریکه کړه خو د راپور تر خپرېدو یې ځواب رانه کړ.
خو له دې وړاندې حکومت یاده موضوع په دیني عالمانو پورې تړلې بللې وه او په خبره یې، په دې اړه د ديني عالمانو له مثبتې پرېکړې وروسته به د هغوی حقوق ورکړل شي.
