د کندهار ښار په بېلابیلو برخو کې پر درنو کارونو بوخت ماشومان له حکومته غواړي چې د زده کړو زمینه ورته برابره کړي او مالي ملاتړ يي وکړي.
بیلال احمد او کبیراحمد دوه هغه ماشومان دي چې له مجبوریه د موټرسیکل جوړولو په ورکشاپ کې کار کوي.
د دوی لویه هېله ښوونځي ته تلل دي خو د ګټي وټي کوم بل کس نه لري او اړ دي چې خپله کسب زده کړې.
بیلال احمد وايي: « زه مجبور یم، کار کوم، پلار مې سپین ږیری دی. د کار کولو لپاره بل څوک نشته. زه کار کوم یو څه ګوزاره کېږي کور ته یو شی نیم وړم. ښوونځي او مدرسې ته نه ځم، ځکه مجبوره یم کار وکړم.»
پر درنو کارونو بوخت یو بل ماشوم کبیراحمد وايي: « په کور کې څه نه لرو نو مجبور یم، دلته راځم کار کوم. کله چې له کار وروسته یو څه پیسې ترلاسه کړم نو کور ته پرې یو څه واخلم.»
د بیلال احمد او کبیراحمد په څېر کندهار کې زرګونه نور ماشومان د خښتو په بټیو، د موټرونو جوړولو په ورکشاپونو، هوټلونو او نورو بېلابیلو ځایونو کې پر درنو کارونو بوخت دي، چې زیات يي له زده کړو هم بې برخې دي.
د ماشومانو د چارو کارپوهان په درنو کارونو د ماشومانو اخته کیدل د اندیښني وړ بولي او زیاتوي چې باید یادو ماشومانو څخه ملاتړ وشي او ورته د زده کړو زمینه برابره سي.
د ماشومانو چارو کارپوه حافظ احمد نعماني وايي: « دولت مکلف دی چې د هېواد بچیانو ته د تعلیم او زده کړو زمینه برابره کړي ترڅو هغه ماشومان چې په شاقه کارونو بوخت دي، زده کړو ته مخه کړي او راتلونکې یې روښانه شي.»
که څه هم کندهار کې پر درنو کارونو او سړک پر سر د بوختو ماشومانو شمیر نه دی معلوم خو د یاد ولایت د کار او ټولنیزو چارو ریاست مسوولین وايي، په تیرو دوو کلونو کې یې سلګونه ماشومان د سړکونو له غاړو راټول او په بېلابېلو دولتي روزنتونو کې یې د زده کړو په موخه شامل کړي دي.
د کندهار کاراو ټولنیزو چارو ریاست د کار آمر مولوي محمد یوسف محمد وايي: « په کندهار کې پر درنو کارونو بوخت ماشومان ټول موږ ښاورنو ته استولي، څوک مو روزنتونونو، څوک وړکتون او څوک مو مدارسو ته استولي دي، ډېر کم شمېر به پاتې وي. دلته پا عینو مینه کې چې دا ځای تاسو ته به معلومات وي عربو جوړ کړی. موږ دلته ۷۰۰ یا ۸۰۰ ماشومانو ته زده کړه ورکوو او د دوی روزنه کېږي.»
د کار او ټولنیزو چارو وزارت د شمیرو له مخې، په ټول هېواد کې څه باندې یو میلیون ماشومان پر درنو کارونو بوخت دي.
