زلمي خلیلزاد له حکومتي مشرانو او سیاسیونو غوښتي چې د بین الافغاني خبرو لپاره ټول منلی پلاوی جوړ کړي.
د بین الافغاني خبرو د پيل او بریا لپاره همه شموله پلاوی له محوري غوښتنو بلل کیږي، چې زلمي خلیلزاد هم له ولسمشر، اجراییه رییس او نورو سیاسیونو غوښتي چې د بین الافغاني خبرو لپاره ټول منلی پلاوی جوړ کړي.
ښايي، د زلمي خلیلزاد له لورې د پلاوي پر جوړیدو ټینګار د امریکا او طالبانو تر منځ د هوکړې د لاسلیک لپاره ښکاره پيغام وي.
افغان حکومت له وړاندې ویلي، دوی د بین الافغاني خبرو لپاره پنځلس کسیز پلاوی جوړ کړی خو د اشخاصو نومونه نه افشاء کوي.
اجراییه رییس عبدالله عبدالله ویلي، پلاوی باید ټول منلی وي.
عبدالله عبدالله داسې وویل (( زه یو ځل بیا اعلان کوم چې د مذاکراتو د پیل لپاره شرط نه لرو خو د خبرو په جریان کې به شرایط وړاندې کړو))
د سولې په چارو کې د دولت وزارت وايي، د پلاوي جوړښت د دوی د ماموریت محوري دنده ده.
د سولې په چارو کې د دولت وزارت ویاندې داسې وویل (( د سولې په چارو کې د دولت وزارت د سولې بهیر او خبرو اترو د حکومت د بشپړ چمتوالي لپاره جوړ شوی دی. دغه وزارت تر اوسه خپل ماموریت په بریالی توګه پر مخ وړی دی چې د ټول منلي پلاوي جوړېدو لپاره هلې ځلې ددغه وزارت له مهمو ماموریتونو څخه دی.))
ظاهرا حکومت چې کومو سیاسیونو ته د پلاوي په جوړښت کې د سهم ګوته نیسي، هغوی نه پوهیږي چې حکومت څه ډول پلاوی جوړوي او کومو کسانو ته په کې برخه ورکوي.
شهزاده مسعود داسې وویل (( که حکومت دا پلاوی جوړ کړی وي تر اوسه یې سیاسیونو سره نه دی شریک کړی چې ایا ملي دی، په ترتیب کې یې څوک شامل دي؟ دوی چې وايي موږ مشورې کړي تر اوسه موږ نه پوهیږو چې چا سره یې مشورې کړي دي.))
ین الافغاني خبرې سر له اوسه اوږدې او جنجالي ځکه ښکاري چې سیاسیون او حکومت به له طالبانو سره په جوړیدونکې ناسته کې تر ډېره فرد محوره غوښتنې ولري او له بل لوري به د سولې ضد څیرې وخت ناوخت هڅه وکړي چې مذاکرات سبوتاژ کړي چې بېلګې یې وړاندې د طالبانو او امریکایانو د خبرو په مهال هم لیدل شوي دي.
