د روسیې فدرالي امنیت ادارې مشر الکساندر بورتنیکوف ادعا کړې، چې د امریکا او بریټانیا استخباراتي ادارې په افغانستان کې د حضور په لټه کې دي او ان د نوموړي په خبره يادې استخباراتي ادارې په افغانستان کې د پوځي اډو پر لرلو غور کوي، چې په دې توګه غواړي په افغانستان او سيمه کې بيا ناامني رامنځته کړي.
بورتنیکوف زیاته کړې:« د امریکا او بریټانیا استخباراتي ادارې د افغانستان په شاوخوا کې د وضعیت په بې ثباته کولو کې مخکښ رول لري. سي.آی.اې او ام-۱۶ د افغانستان په یو شمیر کلیدي ولایتونو کې خپل استخباراتي حضور بېرته ټینګوي او په دغه هېواد کې د امريکا د پوځي اډو د بيا جوړولو پر امکان غور کېږي.»
دې روسي چارواکي ویلي، د امریکا اصلي موخه د افغانستان شمال ته د پرتو هېوادونو د بې ثباته کول او د دې کار لپاره يې د عراق او سوریې په ګډون له نړیوالو ترورستي سازمانونو سره د سربازګيرۍ لړۍ پیل کړې.
بورتنیکوف ویلي، دغه وسلهوال په پرمختلو وسلو سمبال او په منظمه توګه د افغانستان په شمال کې ځای پر ځای کېږي.
هغه زیاته کړې:« د دوی اصلي هڅې او تمرکز په سوېلي سرحدونو کې د بې ثباتۍ کمربند جوړول دي، چې په همدې موخه په عراق، سوريې او يو شمېر نورو اسيايي او افریقايي هېوادونو کې له نړيوالو تروريستي سازمانونو څخه د وسلهوالو د جلب او جذب او د افغانستان په شمال کې یې د ځای پر ځای کول لړۍ روانه ده.»
ومو غوښتل په دې تړاو د اسلامي امارت نظر واخلو خو بریالي نشو. خو د چارو شنونکي ورته ادعاوې حقیقت بولي او په باور یې خپله روسیه هم دې برخه کې لاس لري او د خپلو موخو د ترلاسه کولو لپاره ځینې ډلې روزي.
غوښتنه دا ده چې نور باید د افغانستان حکومت او خلک د پردیو سیاستونو ښکار نه شي او د امنیت ګواښوونکو ډلو د ځپلو لپاره لاس په کار او د روسیې په ګډون هېچاته اجازه ور نه کړي، چې په یوه او بل نوم د افغانستان په کورنیو چارو کې لاس وهنه وکړي.
