پېښو ته د رسېدو په چارو کې د دولت وزارت په هرات ولایت کې د وړمې ورځې د زلزلې له امله د اوښتو ځاني تلفاتو شمېرې خپرې کړې.
د یاد وزارت مسوولین وايي، د هرات په زنده جان ولسوالۍ کې د زلزلې له امله د قرباني شویو کسانو شمېر ۱۲ زرو ته رسېدلی، چې په کې څه باندې ۲ زره کسان مړه شوي.
پېښو ته د رسېدو په چارو کې د دولت وزارت ویاند ملا جانان سایق وايی: « د دغې پېښې له امله تر اوسه د لومړنیو شمېرو له مخې چې موږ ته رسېدلي، له بده مرغه په ۱۳ کلیو کې ۲۰۵۳ کسان شهیدان او ۹۲۴۰ کسان ټپيان شوې دي.»
د جانان په خبره لاهم پلټنې دوام لري او په همدې موخه یې سیمې ته د ژغورنې ۱۰ ټيمونه استولي څو ژر تر ودانیو او خاورو لاندې کسان پيدا کړي.
سایق زیاتوي: « د پېښې له رامنځته کېدو راهیسې مو د دغې پېښې د قربانیانو د درملنې په موخه خپلې ټولې هڅې کړي او د ملي او نړیوالو بنسټونو په ګډون له بېلابېلو بنسټونو څخه ۱۰ د لټون او ژغورنې ټيمونه جوړ او سیمې ته لېږدول شوې دي.»
دغه راز سایق وايي تر اوسه یې د یو شمېر ادارو په ګډه همکارۍ سیمې ته خوراکي، روغتیايي او د موقتې سرپناه لپاره امکانات برابر کړي.
هغه له سوداګرو، شتمنو او مرستندویه بنسټونه غوښتي چې په دې دغه برخه کې له حکومت سره همکارۍ او مرستې چټکې کړي، څو د هرات له زلزله ځپلوسره بېړنۍ مرسته تر سره شي.
وزارت وايي، وروستۍ زلزله چې د رېښتر په کچه ۶.۲ درجې وه په زنده جان ولسووالۍ کې يې ۱۳ کلي او دغه راز ۱۰۳۲۰ کورونه په بشپړ ډول تخریب کړي دي.
