په هالنډ کې د افغانستان سفارت له لوري له کابل سره تر تعامل وروسته، په اسپانیا کې د افغانستان سفارت هم له کابل سره د تعامل خبر ورکړی.
د بهرنيو چارو وزارت په دې اړه وايي، پر وخت د کونسلي خدمتونو د وړاندې کولو او په اسپانیا کې د افغان وګړو ستونزو ته د رسېدنې لپاره له ياد سفارت سره په اړيکه کې دي او زياتوي، چې د کونسلګرۍ د اسنادو تصدیق لیکونه هم له مادريد څخه کابل ته استول کېږي.
د اسلامي امارت ویاند ذبیح الله مجاهد وايي، دمګړې په ټول هېواد کې امنیت تامین دی د هېوادونو ډپيلوماټان کولی شي په کابل کې له وېرې پرته خپل ډپيلوماټیک ماموريتونه پيل کړي.
مجاهد زیاتوي: «هو! په افغانستان کې د اسپانیا سفارت خبرتیا خپره کړې چې دوی د افغانانو لپاره خپل کونسلي فعالیتونه پیل کوي او د افغانستان له بهرنیو چارو وزارت سره په اړیکه کې دي، دا یو نېک اقدام دی او باید باقي پاتې سفارتونو ته هم وغځېږي. ګڼ هېوادونه دي چې د افغانستان سفارتونه هلته اوس د اسلامي امارت د بهرنیو چارو وزارت سره په اړیکه او تعامل کې دي او دا تعامل ان شاءالله مثبت دی او د افغانانو لپاره به خدمات وړاندې کېږي.»
کارپوهان له کابل سره په اسپانیا کې د افغانستان سفارت تعامل د سرپرست حکومت په ګټه بولي، خو غوښتنه کوي، چې د نړيوالو مشروع غوښتنو په منلو له نړيوالې ټولنې سره تعامل ته ځان چمتوو کړي.
د نړیوالو اړیکو کارپوه سمیر انګار وايي:« د افغانستان ډېری سیاسي نمایندګۍ چې په بهرنیو هېوادونو کې دي، د افغانستان د خلکو ستونزو لمنځه وړلو او کونسلي خدماتو لپاره دې د افغانستان له اوسني حکومت سره اړیکې او تعامل ولرې.»
د سیاسي چارو کارپوه عزیز معارج وايي: « که طالبان په رښتیا هم غواړي چې نړۍ سره اړیکې جوړې کړي باید اصلاحات راوړي، د نړۍ شرایط ومني او نړیوال اصول باید ومني، د بشر حقونو ته درناوی وکړي او معیاري ستنډرډ حکومت جوړ کړي، په هغه صورت کې کولی شي چې د عذر او زارۍ او تعامل د خوشالۍ پر ځای اصولاً په رسمي ډول د یوه خپلواک هېواد په توګه موږ په رسمیت وپېژندل شو.»
ځينې کارپوهان بيا باوري دي، چې په افغانستان کې د سرپرست حکومت واکمنېدا او کنټرول واقعيت دی او زياتوي، نړيوال دې هم ورسره د تعامل په موخه خپلو پالېسيو او غوښتنو کې نرمښت اختيار کړي.
د سیاسي چارو کارپوه محمد زلمی افغانیار وايي: « دغه مثبت ګامونه کولی شي دې ته زمینه برابره کړي چې د افغانستان اوسنی حکومت له هغو هېوادونو سره، چې هلته کونسلي خدمات په عادي ډول دوام لري، د هېواد د ملي ارزښتونو یوه واحد تعریف پر بنسټ خپلې سیاسي اړیکې منسجمې کړي.»
څو ورځې وړاندې، هالنډ کې د افغانستان سفارت هم له بهرنیو چارو وزارت سره د خپل تعامل د پیل خبر ورکړی وه. خو له دې وړاندې د بهرنیو چارو سرپرست وزیر مولوي امیرخان متقي ویلي وو چې دوی له ۱۶ زیاتو افغان سفارتونو سره اړیکې لري.
