په هند کې د افغانستان سفارت د فعالیتونو له درېدو وروسته، اوس په دې هېواد کې د افغان زده کړیالانو د انسجام کمېټه هلته د مېشتو زده کړیالانو د راتلونکې په اړه اندېښمنه ده.
افغان زده کړیالان د هند له حکومته غواړي، چې د زده کړیالانو په ګډون دې د مېشتو افغانانو حقونه خوندي او دغه راز دې د راتلونکو احتمالي ستونزو مخنيوي په موخه د سفارت کونسلي چارې بېرته پيل کړي.
هند کې افغان زده کړیال اسحاق سروري وايي: « د نجونو او هلکانو په ګډون ډېری زده کړیالان له اقتصادي او د ویزې د ختمېدو له ستونزو سره مخ دي. دوی ټول غواړي چې هند کې خپلو زده کړو ته دوام ورکړي.»
زده کړیالان وايي، د سفارت تړل کېدل يې په راتلونکې کې له ستونزو سره مخ کوي او په خبره یې د افغانستان سرپرست حکومت دې هم د سفارت بيا فعالولو په موخه هڅې ګړندۍ کړي.
هند کې افغان زده کړیال نظرګل ګلاب زی وايي:« د یوه افغان په حیث د افغانستان په اسلامي امارت غږ کوم چې دغه موضوع دې د هند له بهرنیو چارو له وزارت سره حل کړي. د سفارت او د افغان زده کړیالانو موضوعګانې دې له هغوی سره شریکې کړي او په هند کې د پاتې افغانانو د زده کړو لپاره دې زمینه برابره کړي.»
په ورته مهال د سیاسي چارو کارپوهان، په هند کې د افغانستان سفارت تړل کېدل جدي ستونزه ګڼي او له اسلامي امارته غواړي، چې د سفارت مسئله له سياسي لارو د هند له حکومت سره تعقيب کړي.
د سیاسي چارو کارپوه احمد خان اندړ وايي: «موږ هېله من یو چې د افغانستان اسلامي امارت او د هندوستان حکومت په ګډه سره د یوه سیاسي او حکومتي جوړ جاړي لپاره دغه سفارت بېرته پرانیزي او هلته د افغانستان استازی او ډيپلوماتان ورلېږل شي، څو د هغو کسانو ستونزې حل شي چې په هند کې ژوند کوي.»
د سیاسي چارو کارپوه عزیز معارج وايي: « ډېرې زیاتې ستونزې جوړېږي هلته، ځکه نږدې ۳۵زره زده کړیالان دي، کډوال دي افغانان هلته اوسېږي، د دوی حقوقي ستونزې دي، نکاح خطونه، وکالت خطونه، پاسپورټونه، د پاسپورټ تمدید او نور داسې حقوقي اسنادو لپاره دوی تل هلته مراجع کوله، اوس به نو یا حیدر اباد ته ځي، یا به ممبۍ ته ځي؛ نو دا ستونزې شته، که چېرې کونسلي چارې ورته پرانېستل شي بیا هم د دوی ستونزې هوارېږي. خپله سفارت یوه سیاسي نمایندګي ده دا په وګړو یا کډوالو اغېز نه کوي همدا کونسلي چارې ورته مهمې دي.»
په نوې ډیلي کې د افغانستان سفارت پر سر له جنجالونو وروسته، دې سفارت څو ورځې وړاندې په يوه خپره کړې خبرپاڼه کې وويل، چې د هند حکومت د نه همکارۍ له امله فعاليتونو ته دوام نه شي ورکولی.
