جرمني د افغان سولې لپاره د بین الافغاني ناستې په چمتوالي کار کوي.
د افغانستان لپاره د جرمني ځانګړي استازي د ملي امنیت شورا سلاکار حمدالله محب سره په لیدنه کې دا روښانه کړې چې ناسته د دوی په کوربتوب جرمني کې جوړه شي.
داسې ښکاري چې د طالبانو او امریکایانو تر منځ د افغانستان د ستونزې بهرنی اړخ هوکړې ته نیږدې دی او د کورني اړخ د خبرو لپاره جرمني لاس په کار شوی.
د افغانستان لپاره د جرمني ځانګړی استازی مارکس پوتزل کابل ته راغلی او دا یې روښانه کړې چې دوی د بین الافغاني ناستې لپاره چمتوالی پيل کړی.
دغه ډپیلوماټ د همدې ناستې د جوړیدو په تړاو د ملي امنیت شورا له سلاکار سره هم خبرې کړې دي.
تر اوسه د ناستې جزیات او څرنګوالی رسنیز شوی نه دی خو مالومات دا دي چې په دې ناسته کې د حکومت او طالبانو استازو تر څنګ مهمې سیاسي څېرې او د مطرح احزابو استازي ګډون کوي.
تحلیل دا دی چې بین الافغاني ناسته کې به د ګډون کوونکو تر منځ په موضوعاتو کې زیاته پيچلتیا او د نظر اخلاف وي چې دا ټکي به د ستونزو او د زیات وخت د ضایع سبب شي.
د ولسي جرګې ځېنې غړي بیا د ښې او ژر هوکړې د تفاهم لپاره د ټول منلو اشخاصو ګډون اساسي شرط ګڼي.
له قطر څخه مالومات دا دي چې طالبان او امریکایان د هوکړې د لاسلیک لپاره په چمتوالي بوخت دي او رسمي ادرسونه وايي چې ممکن د روانې میاشتې تر پای هوکړه لاسلیک شي.
د هوکړې له لاسلیک سره سم به بین الافغاني خبرې پيل شي چې دې ناستې ته هم ټول اړخونه د چمتوالي په حال کې ښکاري.
