رويټرز د ځینې طالب سرچینو له قوله لیکلي چې د طالبانو مشرتابه منلې چې د سولې هوکړې سره سم له امریکایي ځواکونو سره لس ورځنی اوربند کوي او له افغان ځواکونو سره به تاوتریخوالی راکموي.
رویټرز ویلي، د سولې له هوکړې وروسته به طالبان او افغان حکومت په جرمني کې د سولې خبرې پیل کړي.
طالب سرچینې ویلي، ” امریکا غوښتل چې موږ د سولې خبرو په جریان کې اوربند اعلان کړو چې زموږ مشرتابه ونه منله. زموږ شورا منلې چې د سولې هوکړې لاسلیک سره سم به اوربند کوي.”
له دې سره د سولې په چارو کې د حکومت وزیر سلام رحیمي وايي د سولې د راوستلو او په دې برخه کې د پرمختګ لپاره له اوربند پرته پر بل څه باور نشته.
ښاغلي رحیمي زیاته کړه چې په قطر کې د امریکا او طالبانو ترمنځ روانې خبرې له نژدي څاري او که خبرو کې پرمختګ وشي نو افغان حکومت چمتو دی چې د خبرو له لپاره خپل پلاوی واستوي.
د افغان سولې لپاره د امریکا ځانګړي استازي زلمي خلیلزاد وړاندې هم د تاوتریخوالي او جګړې د کمولو په اړه ویلي وو او د بین الافغاني خبرو لپاره یې پر اوربند ټینګار کړی و
د پاکستان بهرنیو چارو وزیر شاه محمود قریشي فاکس نیوز سره د ځانګړو خبرو په مهال ویلي، پاکستان له افغانستان د بهرنیو سرتیرو د مسولانه وتل غواړي او باید د اتیایمې لسیزې تیروتنې تکرار نه شي.
قریشي له حقاني شبکې د ای ایس ای د ملاتړ په تړاو وویل، د تیر په اړه خبرې نه کو، هر کس ګټې راتلونکې سره دي.
