د طالبانو مشر ملا هبت الله د تاوتریخوالي د کمېدو هوکړه تایید کړې.
د طالبانو او امریکایانو تر منځ پیل شوې خبرې تر اوسه په ګونګ حالت کې دي خو تازه په قطر کې سرچینې وايي، ممکن خبرې له اوسني مبهم حالت څخه ژر ووځي.
د سولې خبرو څارونکي وايي، د طالبانو مشر ملا هبت الله له اوږده ځنډ وروسته د خپلو قومندانانو هغه پریکړه تایید کړې چې له مخې یې د تاوتریخوالي د کمښت غوښتنه شوې وه.
ازاد خبریال سیمع یوسفزي داسې وویل (( له اوږدې مودې وروسته د طالبانو مشر ملا هبت الله اخوند هغه هوکړه منلې، ده چې وسله وال طالبان به په ښارونو کې د یوې اونۍ موده کې تاوتریخوالی نه کوي .))
طالبانو تر اوسه په دې اړه رسمي څه نه دي ویلي خو مخکې یې ویلي وو چې دوی د خپل مشر وروستۍ پریکړې ته په تمه دي.
د امریکا د سولې خبرو مرکچیان هم دا مهال قطر کې دي او د طالبانو د پریکړې په اړه یې رسمي څه نه دي ویلي.
افغان حکومت ته د طالبانو دا پریکړه اهمیت نه لري.
د ولسمشر ویاند صدیق صدیقي داسې وویل (( موږ دا وایو چې د سولې لپاره اوربند یو اساسي اصل دی دا غوښتنه د ټول ملت ده چې لومړی دې اوربند وشي جګړه دې ودرول شي بیا به د یوې با عزته او دایمي سولې لپاره مذاکرات پيل کړو.))
له دې ورهاخوا تازه د امریکا متحدو ایالاتو یو څېړنیز مرکز ویلي چې په افغانستان کې د سولې ټینګښت فرصت تر بل هر وخت زیات شوی، سیمه او نړۍ کې د افغان سولې په اړه تر بل وخت نظریات نیږدې شوي او په دې برخه کې کاملا اجماع شته.
ارګ ډاډه دی چې له سولې سره به سیمه کې د افغانستان رول لامثبت او زیات شي.
د طالبانو او امریکایانو تر منځ څه باندې یوه میاشت مخکې د سولې خبرې بیا ودریدې چې ظاهرا دواړو غاړو د جګړې د کموالي لپاره په خپلو کې سره مشورې پیل کړې.
تر اوسه مالومه نه ده چې امریکا به د طالبانو د تاوتریخوالي کمښت په مقابل کې څه کوي؟ خو دا نظر شته چې ممکن امریکا هم په طالبانو خپل بریدونه ودروي.
