که پاکستان له ترهګرۍ لاس وانه خلي امریکا ته به مسول هېواد وي.
د امریکا د بهرنیو چارو وزیر وایي، تمه داده چې پاکستان به تر دې وروسته په خپله خاوره کې ترهګرو ته خوندي ځایونه ور نه کړي.
افغانستان کې تحلیل کوونکي وایي، که امریکا د ترهګرۍ مخنیوی غواړي پاکستان باندې دې د ایران او شمالي کوریا په څېر فشارونه راوړي.
امریکا یوځل بیا له پاکستان غوښتي چې خپله خاوره کې د وسلوالوخوندي ځایونه له منځه یوسي، هغه مرکزونه چې د افغانستان د جګړې لپاره پکې وسله وال روزل کیږي.
د امریکا د باندنیو چارو وزیر چې خبریالانو ته یې خبرې کولې وویل د سویلي اسیا لپاره پالیسي واضیح ده او زموږ پیغام تر دې زیات څرګندیدای نشي چې په دې پاکستان هم پوهیږي.
د امریکا د بهرنیو چارو وزیر مایک پمپیو داسې وویل (( که پاکستان د ترهګرو په له منځه وړلو کې لازمه هڅه و نه کړي موږ ته به مسوول وي، ټول په افغانستان کې سوله او ټيکاو غواړي خو که پاکستان طالبان او حقاني ډله ساتي نو سولې او پخلاینې ته رسیدل ناشوني دي. او پاکستان هم پوهیږي چې دا زموږ دریځ دی چې مخکې مو هم ورته څو ځل یادونه کړې ده.))
د جنوبي اسیا لپاره د امریکا تګلاره کې چې پاکستان ته په کې خبرداری و، له یوکال تېرېدو وروسته نه یوازې پاکستان بدل نه شو بلکه له روسیې، ایران او چین سره نږدې شو چې اوس امریکا ته په یو ګواښ بدلېدای شي.
تحلیل کوونکي په دې باور دي چې د امریکا فشارونه او کړن لاره د پاکستان په تړاو جدي نه ده.
کابل هم ترهګرۍ سره د مبارزې په برخه کې د اسلام اباد له ونډې خوښ نه دی چې د کندهار وروستۍ پېښې د دواړو هېوادونو ترمنځ اړیکې لا نورې خرابولی شي، ځکه ولسمشر غني باور لري چې جنرال رازق د ترور پېښه په پاکستان کې جوړه شوې او دغه هېواد باید حساب ورکړي.
باور کېږي پاکستان کې د افغانستان سره د خپلې بقاء جګړه پرمخ وړي او نړۍ سره تېر ایستونکي لوبه پرمخ وړي.
په سیمه کې د امریکا سیال هېوادونه هم غواړي چې پاکستان خوندي وساتي او د خپلو موخو لپاره یې وکاروي.
