د سپټمبر ۲۷مه د ګرځندوی له نړیوالې ورځې سره برابره ده او دا ورځ په کابل کې هم د يو لړ مراسمو سره ونمانځل شوه.
د اطلاعاتو او کلتور وزارت سرپرست خیرالله خیرخوا وایي، تېرو دوو کلونو کې د هېواد په څلورو سیمو نورستان، غور، ځاځي اریوب او بند امیر کې سیلانونو ته د اوسېدنې او اړونده نور امکانات برابر کړي او په خبره يې پلان لري، له دې سربېره نورو سيمو کې هم سیلانيانو ته د اسانتياوو رامنځته کولو په موخه ۷۰ ميليونه افغانۍ پانګهونه وکړي.
خیرخوا زیاتوي: « له ټولې نړۍ چې اټکل شوې، وايي په ۲۰۲۰ کې چې د دې حساب وشو؛ نو نږدې یو میلیارد سېلانیان کېږي، یعنې یو میلیارد سېلانیان په نړۍ کې ګرځېدلې دي دا ډېر لوی عدد دی. له دې بېلا بېلو هېوادونو ته ګټې رسېږي او د ځېنې هېوادونو د اقتصاد یوه برخه ګرځېدلې.»
د یاد وزارت د نشراتو معین حیات الله مهاجر فراهي وايي، واک ته د اسلامي امارت له رسېدو راهيسې له بېلابېلو هېوادونو څخه ۴ زره او ۵۰۰ سېلانیان افغانستان ته راغلي او له درکه يې ۱۰۰ ميليونه افغانۍ عوايد ترلاسه شوي.
فراهي زیاتوي: « ویلي شو چې د نړۍ له ټولو هېوادونو زموږ هېواد ته سېلانیان راغلي دي. موږ په خپل هېواد کې بېلا بېل طبعي منظرې لرو، تاریخي عابدې لرو، په غور، مزارشریف، هرات، کندهار، نورستان ، بامیانو، بدخشان او د هېواد ډېری لویو ولایتونو او هغو ولایتونونو چې تاریخي عابدې ډېرې لري؛ نو دوی له هغو سیمو لېدنه کوي. شاوخوا ۱۰۰ میلیونه افغانۍ له دې لارې څخه عواید راغلي دي.»
په دارالاامان ماڼۍ د ګرځندوی نړیوالې ورځې په موخه جوړې شوې غونډې کې بیا د سیاحتي شرکتونو استازي وايي، په ټول هېواد کې ۲ زره سیاحتي شرکتونه شتون لري، خو غوښتنه کوي، چې په ټولو ولایتونو کې دې کلتوري اتشې جوړې شي، څو غوره سیاحتي خدمتونو وړاندې کولو ته زمینه برابره شي.
د سیاحتي شرکتونو استازی حسنزی منګل وايي: « دا چې څنګه بهرني سېلانیان موږ را جلب کړو، کورني خو الحمدالله اوس ټولو ولایتونو ته ځي؛ د دې لپاره مې لومړنۍ غوښتنه د اطلاعاتو او کتور وزارت څخه دا ده چې ټولو هغو سفارتونو کې چې د اسلامي امارت تر لاس لاندې دي او اسلامي امارت پرې حاکم دی، هلته کلتوري اتشې فعالې کړي، څو دا کلتوري اتشې تبلیغات وکړي، د افغانستان انځور بهرنیو سیلانیانو ته په داسې بڼه وښي چې دلته امنیت دی او هغه تاریخي او تفریحي ځایونه چې تاسې یې غوښتنه کوئ هلته راشئ.»
د سپټمبر ۲۷ مه د ګرځندوی نړیواله ورځ نومول شوې، دا ورځ هر کال په همدې نیټه د نړۍ په بېلابېلو هېوادونو کې د ګرځندوی د ارزښت ښودنې او پراختيا په موخه نمانځل کېږي.
