طالبانو ته نیږدې کسان وايي، د تاوتریخوالي د کموالي یا نا اعلان شوي اوربند طرحه خلیلزاد ته سپارل شوې ده.
پوره یوه میاشت د طالبانو او امریکایانو تر منځ ظاهرا خبرې له دې امله وځنډلې چې دواړه لوري د تاوتریخوالي په کمېدو خبرې کوي.
د مالومات په اساس طالبان له زیاتو مشورو وروسته د تاوتریخوالي په کمېدو سلا شوي چې وروستۍ پریکړه یې خپل مشر ته پرېښې .
اوس طالبانو ته نیږدې کسان وايي، طالبانو د تاوتریخوالي د کمېدو چې په اصل کې نااعلان شوی اوربند دی طرحه یې زلمي خلیلزاد ته سپارلې ده.
د سولې د خبرو څارونکي وايي، تر هغې مهاله چې د تاوتریخوالي په کمېدو توافق رانشي دواړه لوري بېرته خبرو ته نه را ګرځي.
د طالبانو او امریکایانو تر منځ په خبرو کې د ځنډ یو لامل د دواړو لوریو تر منځ د باور نه موجودیت هم ښودل کیږي.
د ولسي جرګې مخکېنی مرستیال ظاهر قدیر وايي، د حکومت په شمول ټول اړخونه باید د سولې لپاره ژمن او صادق ووسي.
د طالبانو او امریکایانو تر منځ د سولې خبرو کابو یو کال په پوره کېدو دی خو تر اوسه مالومه نه ده چې څه وخت به سرته رسیږي.
خو موثقې سرچینې وايي، د دوی تر منځ خبرې خلاص شوي د هوکړې لاسلیک مخه یوازې د تاوتریخوالي مسلې ډب کړی دی.
