د افغانستان لپاره د ملګرو ملتونو ځانګړې استازې او د یوناما مشرې روزا اوتنبایوا د دغه سازمان امنیت شورا ته په یوه راپور کې وویل، تر هغې چې اسلامي امارت خپل داخلي مشروعیت ترلاسه نه کړي نړیوال مشروعیت نه شي اخېستلی.
امنیت شورا د افغان ښځو او نجونو وضعیت ناوړه بللی او ویلي یې دي، په افغانستان کې روان بشري بحران د نړیوالو پاملرنې ته اړتیا لري.
اوتنبایوا په ناسته کې دغه راز پر افغان ښځو او نجونو د محدودیتونو زیاتېدو تر څنګ په دغه هېواد کې د بېوزلۍ پر زیاتېدو خبرې کړې دي.
اوتنبایوا ویلي، که څه هم اسلامي امارت ټینګار کوي چې د دوی ادارې ټولشموله دي، خو داسې ښکاري چې د دوی د مشروعیت او خلکو ترمنځ فاصله په زیاتېدو ده.
د نوموړې په وینا د حقونو، حساب ورکولو، استازولۍ او د عدالت لاسرسي په تړاو بې باوري د داخلي مشروعیت پر وړاندې مهم خنډ دی او له داخلي مشروعیت پرته نړیوال مشروعیت نه شي ترلاسه کېدای.
نوموړي له اسلامي امارت سره د نړۍ پر تعامل ټینګار کړی دی، خو ویلي یې دي، چې دا تعامل به د اسلامي امارت د رسمیت پېژندلو په مانا نه وي.
د افغانستان په تړاو د امنیت شورا په دې ناسته کې د ملګرو ملتونو د ښځو برخې اجرائیه مشرې سیما سامي بحوث ویلي، په افغانستان کې ښځې غوښتنه لري چې غږ یې واورېدل شي.
بحوث ویلي، افغان ښځې غوښتنه لري چې نړیواله ټولنه دوی ته زمینه برابره کړي څو له اسلامي امارت سره په مستقیم ډول خبرې وکړي، نړیوال دې په خپل پلاوي کې د ښځو له حضور پرته له اسلامي امارت سره ونه ګوري.
اسلامي امارت بیا د امنیت شورا پر وروستیو څرګندونو تر اوسه پورې کوم غبرګون نه دی ښودلی.
