امریکا هیڅ پلان نه لري چې له عراقه خپل ځواکونه وباسي.
د امریکا دفاع وزیر مارک ایسپر رسنیو ته ویلي چې له عراقه د وتلو هیڅ ډول پلان نه لري او امریکايي ځواکونه به هلته پاتې وي.
ایسپر د رسنیو له لوري د یوه خپور شوي لیک په تړاو راپورونه هم رد کړل چې په کې د وتلو خبره شوې وه.
هغه و ویل، امریکايي جنرالان خپلې دندې ته ژمن دي او داسې کوم لیک عراقي چارواکو ته نه دی ورکړ شوی.
د امریکا د لوي درستیزانو د ګډې کمیټې مشر مارک میلي هم ټينګار وکړ چې د اوس لپاره به په عراق کې پاتې وي.
هغه و ویل، امریکا تر اوسه ژمنه ده چې په عراق کې له داعش او نورو سخت دریځو ډلو سره مبارزې او جګړې ته دوام ورکړي.
دا خبرې وروسته له هغې کیږي چې عراق پارلمان د یوې طرحې په وړاندې کولو سره له امریکايي ځواکونو غوښتي چې له عراق و وځي.
