طالبان او امریکایان بېرته خبرو ته د ګرځېدو په حال کې دي.
طالبانو تر لسو ورځو زیاتې یوازې په خپل منځي مشورو تېرې کړې چې څنګه کولی شي د باور لپاره په جګړو کې کموالی راولي.
ظاهرا د طالبانو کورنۍ دنده اوربند و، خو اوس طالبان وايي، دوی اوربند نه بلکې د تاوتریخوالي په کمېدو مشورې کړې دي.
د طالبانو مشورې بشپړې شوي او اوس بېرته له امریکا سره د خبرو د بیا پيل لپاره په چمتوالي بوخت دي او ښايي دغه خبرې تر راتلونکو دوو ورځو پيل شي.
د خلاصون لارې شورا مشر اکبر آغا داسې وویل (( ډېر احتمال لري، چې هغه بهرني مذاکره کوونکي چې قطر کې و د نوي کال نمانځلو لپاره خپل هیواد ته تللي او اوس بیرته راځي او ممکن په راتلونکو دوه ورځو کې د طالبانو او امریکا خبرې پيل شي.))
موثقې سرچینې وايي پيل کېدونکې خبرې تر پخوانیو هغو ځکه مهمې او حساسې بلل کیږي چې طالبان به د یوالي ازموینې ورقه د امریکايي پلاوي په میز کیږدي.
دغه راز امریکا به هم د دوی د یوه قوت، یو لاس او د باور لپاره د هوکړې لاس لیک ته ورمخکې شي.
خو د دواړو تر منځ په یو بل د بې باورۍ زیاتېدل هم له امکان څخه لېرې خبره نه ده.
له دې سره افغان حکومت داسې سوله غواړي چې جګړه ورسره ختمه او شته لاسته راوړنې خوندي پاتې شي.
د ملي امنیت شورا ویاند جاوید فیصل داسې وویل (( په سوله کې د افغان دولت موقف روښانه دی، سوله باید د ټولو جګړو پای وي، دوامداره او با عزته وي. او وکولای شي د تېرو کلونو لاسته راوړنې خوندي کړي.))
په قطر کې سرچینې وايي، د امریکا تخنیکي پلاوی قطر کې دی او د طالبانو ټول غړي هم بېرته را ستانه شوي.
د مالوماتو له مخې د طالبانو مشر ملا هبت الله به په شویو مشورو د تصدیق مهر وهي او له هغې وروسته همدا متن د طالبان او امریکایانو تر منځ تر بحث لاندې نیول کیږي او وروسته به له رسنیو سره شریک شي.
