په پنځلس ولایتونو کې د ثبت شویو شکایتونو ډلبندۍ خلاصې او څیړنه یې پیل شوې.
دا څلورمه ورځ ده چې ټاکنیزو شکایتونو ته د رسیدګۍ کمیسیون د شکایتونو څیړلو لړۍ پیل کړې خو لاهم د شکایتونو په ډلبندۍ بوخت دی .
د ټاکنیزو شکایتونو کمیسیون کمېشنر قاسم الیاسي وايي، تردې مهال په پنځلس ولایتونو کې د شکایاتو ډلبندي خلاصه کړې او په راتلوونکو څلورویشت ساعتونو کې به د نوي سلنې شکایاتو ډلبندي او په کټه ګوریو د ویش چارې پایته ورسیږي .
په ورته وخت کې مخکښ ټاکنیز ټیمونه له دغه کمیسیون غواړي چې ټاکنیز عدالت پلی او له قانون سره سم شکایتونو ته رسیدګي وکړي .
د شکایتونو کمیسیون بیا ډاډ ورکوي چې له قانون به هیڅ کله هم سرغړونه و نه کړي او ټول اقدامات به یې د کمیسیون له طرزالعملونو سره سم وي .
په ورته مهال د افغانستان د ژغونې لپاره د سیاسي ګوندونو ایتلاف ګواښ کړی چې ټاکنیزو ټیمونه او سیاسي جریانونه نه شي کولای د قانون خلاف د وروستیو پایلو له اعلان وړاندې ټاکنیزه فضا ګډه وډه کړي.
لا له وړاندې ځینو سیاسي جریانونو او انتخاباتي ټکټونو ویلي چې ټاکنې پایله نه لري او باید انتخابات محوره مصلحتي حکومت رامنځته او ټولو خواو ته دې پکې ونډه ورکړل شي .
