طالبان د اوربند لپاره کوم تصمیم نه لري او د تاوتریخوالي د کمیدو په تړاو بحثونه روان دي.
له قطر څخه پاکستان ته د طالبانو پلاوي په ورتګ سره رسنیو د طالبانو په قول داسې راپورونه خپاره کړل چې دغې ډلې امریکا سره په اوربند هوکړه کړې او ژر به یو لنډمهالی لس ورځینی اوربند اعلان شي.
اوس طالبانو د ډزبندیز په اړه ټول راپورنه له مخې رد کړل او په خبرپاڼه کی یې ویلي چې په دې اړه کوم تصمیم نه لري.
د وسلوالو طالبانو د اعلامیې یوه برخه کې داسې راغلي (( واقعیت دادی چې اسلامي امارت د اوربند کوم تصمیم نه لري، امریکایانو د جګړې د حجم او د عملیاتو د کمښت غوښتنه کړې، چې د اسلامي امارت په جهت کې په همدې مشخصه مسئله مشورې روانې دي.د اسلامي امارت د مشرتابه لخوا تراوسه نهايي پریکړه نه ده شوې او نه هم په دې اړه د اسلامي امارت په صف کې کوم اختلاف شته.))
اوربند د سولې په خبرو کې د افغان حکومت مخکې له مخکې شرط دی او سولې ته د رسېدو لپاره یې مناسبه لار ګڼي.
د سولې په اړه ټول مزاکرات پټ ساتل شوي او ډېر کم مسایل تر اوسه پورې رسنیو ته راوتلي دي، خو ټینګار دادی چې د جګړې اړخونه دې سولې ته د رسېدو لپاره اوربند ومني.
طالبان په اوصولو کې د اوربند مخالف نه دي او ترڅو چې امریکا سره خبرې یو طرفه نه شي دغه ډله نه بین الافغاني خبرو ته کېني او نه به هم اوربند اعلان کړي.
د ملي شورا غړي هم د ټیکاو راتګ په اوربند کې ویني.
تمه کېږي چې طالبان او امریکایان به د کرسمس وروسته بیا خبرو ته کېني هغه خبرې چې اوس د دمې او مشورې په پلمه درېدلې دي.
