کابل ښار کې د هوا ککړتیا کچې راټیټولو لپاره د جدیت تر څنګ عامه پوهاوی ته اړتیا ده.
د کابل ښار ککړه هوا،چې کنټرول یې د چاپیریال ساتنې ادارې ته ستونزمن کار ښکاري.
د یکشنبې ماښام کورنیو چارو وزارت امنیتي مرستیال له یو ګډ پلاوي سره د کابل ښار ځینو سیمو کې ګرځیدلی او یو شمېر هغه ځایونه یې تړلي چې د تودوخې لپاره به یې د ډبرو سکاره کارول.
د چاپیریال ساتنې ادارې د مالوماتو له مخې د غیر تصفیه شویو سون توکو سوځولو پرته، د غیر معیاري تیلو واردول، خامه سړکونه او ترافیکي ګڼه ګوڼه هغه څه دي چې د هوا ککړتیا لوی لاملونه ګڼل کیږي.
کابل ښار کې غیر معیاري ودانۍ، د شنو سیمو کموالی چې په نشت حساب دي، ښاریان یې د ککړې هوا لامل بولي او په دې برخه کې د خلکو مسوولیت باندې ټینګار کوي.
له دې سره د چاپیریال ساتنې ادارې او روغتیا وزارت د ښاروالۍ په همکاري د ښار ځینو برخو کې ماسکونه ویشلي چې د ککړې هوا تنفس زیان نسبي کم شي.
د عامه پوهاوي تر څنګ کورنیو چارو وزارت په جدیت سره کار کوي چې څنګه کیدلی شي د ککړې هوا نسبي مخه ونیسي او په دې برخه کې د ولسمشر غني لارښوونې عملي کړي، هغه لارښوونې چې له مسوولو ادارو یې د نسبي پاک چاپیریال غوښتنه کړې.
