د ولسمشر غني سترسلاکار وحید عمر وايي، د سولې خبرې لاهم په اوربند مشروط دي.
عمر پر ټوېټر لیکلي، د اوربند په تړاو زموږ دريځ روښانه دی. اوربند زموږ لپاره شرط دی. اوس دا د طالبانو پرېکړه ده چې څه کوي. موږ نشو کولای په شایعاتو تبصره وکړو. هرکله چې طالبانو خپل رسمي دريځ روښانه کړ، موږ به خپله تبصره پرې وکړو.
د عمر دغه څرګندونې داسې مهال کېږي چې طالبانو ته نږدې سرچینو منلې چې د دې ډلې مشرتابه د یوې اونۍ اوربند منلی دی.
له دې سره عمر زیاته کړې چې حکومت به د سولې مذاکراتو لپاره ټول شموله مذاکراتي ټیم وټاکي او دغه ټیم به لوی نه وي.
عمر ویلي، موږ په تمه یو چې د طالبانو او امریکا ترمنځ خبرې پای ته ورسېږي، اوربند اعلان شي او طالبان زموږ له پلاوي سره د سولې خبرو لپاره چمتووالی وښيي.
