ټاکنیزو شکایتونو کمېسیون سره شپاړس زره شکایتونه ثبت شوي او نن یې د ثبت شویو شکایتونو د څېړنې لړۍ پیل کړه.
د شکایتونو د ثبت لړۍ د چهارشنبې په ورځ پای ته ورسېده چې اوس د ټاکنیزو شکایتونو له کمېسیون سره ۱۶ زره او دوه سوه شکایتونه ثبت شوي دي.
زیات شکایتونه د دوه ټيمونو دي چې د ثبات او همپالنې ډلې ۸ زره، سولې او اسلامي عدالت ۴۴۰۰، دولت جوړونې شاوخوا درې زره او ۱۵ نور د عدالت او امنیت ډلې له اړخه ورکړل شوي دي.
شکایتونو کمېسیون ډاډ ورکړ چې په پوره بې طرفۍ به کار وکړي او سیاسي فشارونه پرې نه شته.
شکایتونو کمېسیون سره هم د زیات شمېر شکایتونو اندېښنه شته او باور یې نه کاوه چې دومره زیات شکایتونه به دوی سره ثبتېږي.
د شکایتونو زیاته برخه کابل کې ثبت شوي او کمېسیون به په ولایتونو کې د شکایتونو څېړنه پیل کړي.
اوس به ولیدل شي چې دا لویه کچه شکایتونه به په ټاکلې نېټه وڅېړل شي او که لا زیات وخت به وغواړي.
د اوس لپاره کمېسیون د رایو په اړه څه نه وايي چې څومره رایې به باطلې شي او په دې اړه هم قضاوت له وخت مخکې دی چې ټاکنې دویم پړاو ته ځي که اول پړاو ګټونکي لري، دا هغه پوښتې دي چې وخت سره سم به ځواب شي.
