د ارشاد حج او اوقافو وزارت افغان حاجیانو ته د هغو پيسو د بېرته ورکړې بهیر پیل کړ، چې سږکال د حج ادا کولو په مراسمو کې له لګښتونو سپما شوي.
د یاد وزارت وزارت سرپرست نور محمد ثاقب وايي، له هر کس يې د حج ادا کولو لپاره ۳۸۲۸ ډالر اخېستي وو، چې له درکه يې ټولټال څه باندې ۱۱۵ میلیون ډالر راټول وو.
د ثاقب په خبره، له افغان حاجيانو ترلاسه شویو پيسو ۱۱۲ ميليون ډالر لګول شوي او ۳ ميليون هغه سپما پاتې دي، چې بېرته يې حاجيانو د وېش لړۍ پيل شوه.
ثاقب زیاتوي: « له حاجیانو څخه ټولې ۱۱۵ میلیونه ۱۷۳ زره ۵۴۹ ډالر او ۲۸ سنټه اصول شوې وو، د حج د لګښتونو د جدول له دقیقې محاسبې وروسته ټول ۱۱۲ میلیونه ۲ زره ۸۵۸ ډالر او ۲۹ سنټه مصرف شوې دي.»
ثاقب وايي، سپما شویو پيسو ته شوې محاسبه ښيي، چې له لګښت وروسته د هر یوه کس سل ډالر اضافه کېږي او د يوې منظمې پروسې له مخې به بېرته ورته ورکړل شي.
ثاقب زیاتوي: « له ټولو حاجیانو د راټولو شویو پیسو څخه د ۳ میلیونه ۱۷۰ زره ۶۹۰ ډالر او ۹۹ سنټه پاتې شوې، چې د ارشاد حج او اوقافو وزارت له دقیقې محاسبې وروسته د في نفر حاجي ته ۱۰۸.۰۴ رسېږي او دا به بېرته ورکړل شي.»
افغان حاجیان چې سږ کال يې په یادو مراسمو کې ګډون کړی و وايي، د نورو هېوادونو د وګړو په پرتله ورته امکانات زیات برابر وو او لګښت یې کم شوی.
حاجي عرفان الله وايي: « ما شاء الله شفافیت ډېر ښه وه او هلته خدمات هم ښه وو او شفافیت خو وزیر صېب هم وویل او ټوله پروسه یې بیان کړه؛ د ګاونډیو هېوادونو په پرتله افغانانو لپاره پیسې ډېرې کمې وې، نورو ته تر ۴ زره یا ۴ نیم زرو کمې نه وې او زموږ یعنې افغانانو لپاره ۳ زره ۷۰۰ ډالر مصرف راغلی دی.»
د مسولینو د مالوماتو له مخې، سږ کال له افغانستانه د حج په مراسمو کې ۳۰ زره حاجیانو ګډون درلود، چې پروسه يې یوه میاشت وړاندې په بریالۍ توګه پای ته ورسېده.
