له تېرو څو ورځو راهیسې په ننګرهار کې پر کلدارو پېر او پلور بند شوی دی.
ننګرهار کې د کلدارو مخنیوي او افغانیو دودولو کمپاین له نورو کلونو سره په ډېر توپېر روان دی.
هلته اوس ولسي خلک په خپله خوښه صرافانو ته ورځي او کلدارې په افغانیو بدلوي؛خو ستونزه دا ده چې په صرافۍ مارکېټ کې واړه بانک نوټونه نشته.
د افغانستان بانک بیا وایي، واړه بانک نوټونه یې ویشلي او ستونزه به حل شي.
ولایتي ادارې تر دې وروسته په کلدارو د پیر او پلور بندیز لګولی.
خلک هم خوښ دي، چې افغانۍ په بشپړه توکه چلښت ومومي.
خلک وایي،مسؤلین دې اوس نرخونه کنټړول کړي او د کلدارو مخنیوی دی هم جدي او دایمي شي.
د جلال اباد ښاریان داسې وايي (( خلک خوښ دي چې د کلدارو پر ځای اوس خپلې افغانۍ کاروي دوکانداران هم په ا فغانیو راکړې ورکړې باندې خوشحاله دي خو مسوولې ادارې دې نرخونه کنټرول کړي.))
ولسي خلک نیوکه کوي، چې په صرافۍ بازار کې واړه بانک نوټونه نشته او هم صرفان د کلدارو بدلولو په برخه کې انصاف نه کوي او باید مسؤلین ددې چارې مخه ونیسي.
خو صرافۍ مارکېټ کې هټۍ وال وایي، دوی سره افغانۍ کمې دي.
د ننګرهار والي شاه محمود میاخېل وایي، نور په دې ولایت کې د کلدارو چلښت بند دی او هغوی به مجازات شي چې په کلدارو پېر او پلور وکړي.
جلال اباد کې د توکو تازه نرخ نامې هم ویشل شوي؛ خو خلک یې د تطبیق غوښتنه کوي.
دلته پرېکړه شوې، که هر هټۍ وال په تکراري ډول ونیول شوي، چې توکي په کلدارو پلوري د هټۍ جواز ترې اخېستل کېږي
