د ټاکنو د لومړنیو پایلو اعلان د یوناما، امریکا او ناټو له هرکلي سره مخ دی.
کابل کې د ملګرو ملتونو ادارې د امريکا او فرانسې سفارتونو سربېره ناټو هم د ولسمشريزو ټاکنو د لومړنيو پايلو د اعلان هر کلی کړی.
يادو ادارو ويلي، چې دا پايلې لومړنۍ دي او شکايتونو کمېسيون بايد د نوماندانو شکايتونه په پوره دقت او معين وخت کې وڅېړي.
د ولسمشريزو ټاکنو لومړنيو پايلو وروسته اجرايه مشر عبدالله عبدالله ويلي، چې د ټاکنو پايلې نه مني او د خلکو له رايو دفاع کوي.
يوناما په یوه خپره شوې اعلامیه کې لیکلي (( موږ د پایلو د اعلان هرکلی کوو، ټول کاندیدان ددې فرصت لري، چې خپلې اندیښنې، د مناسبو میکانیزمونو له لارې، په ټاکل شوي وخت کې د اړونده قانوني چوکاټونو، مقررو او تګلارو پراساس مطرح کړي. ))
له يوناما سربېره کابل کې د امریکا سفیر د ولسمشريزو ټاکنو د لومړنيو پايلو د اعلان هرکلی کړی او ويلي یې دي، چې د کمېسیون له لوري اعلان شوې پایلې وروستۍ نه دي.
کابل کې د امريکا سفير جان باس داسې ویلي ((موږ له کمشنرانو او د کميسيون له کار کوونکو مننه کوو چجې پایلې یې اعلان کړې، دا د ټولو افغانانو لپاره مهمه ده، چې په ياد ولري، چې دا پايلې وروستۍ نه دي. ))
د ناټو ملکي استازي نېکولاس کې هم د کمېسيون له لوري د ټاکنو د لومړنيو پايلو د اعلان هر کلی شوی.
افغانستان کې د ناټو ملکي استازي له دفتر خپره شوې خبرپاڼه کې داسې لیکل شوي (( د ناټو ملکي استازی نېکولاس کې د ټاکنو خپلواک کمېسيون له لوري د لومړنيو پايلو د اعلان هر کلی کوي او په دې برخه کې د افغان امنيتي او دفاعي ځواکونو د هڅو ستاينه کوي، چې د ولسمشريزو ټاکنو امنيت يې خوندي کړ.))
کابل کې د فرانسې سفارت هم د لومړنيو پايلو له اعلانه خوښه ده او وايي، چې ټاکنيز شکايتونه بايد په سمه توګه وڅېړل شي.
کابل کې د فرانسې سفارت داسې ویلي (( ټول شکايتونه بايد د ټاکنيزو شکايتونو کمېسيون له لوري په کامل درناوي، حق او استقلاليت سره وڅېړل شي.))
د عبدالله عبدالله په مشرۍ ثبات او همپالنې ټيم وايي، دا پايلې نه مني او خبرداری یې ورکړی چې د خلکو له رايو دفاع کوي.
د ثبات او همپالنې ټیم د اعلامیې یوه برخه کې بیا داسې ویل شوي ((ثبات او همپالنې ټیم به د افغانستان د شریفو خلکو له رایو د ټولو قانوني لارو څخه په ګټې اخیستنې دفاع وکړي او اجازه به ورنکړي، چې څوک یې پر رایو معامله وکړي.))
د ولسمشر غني په مشرۍ، دولت ساز ټيم، چې په لومړنيو پايلو کې ترټولو مخکښ دی د پايلو د اعلان هر کلی یې کړی او وايي، چې شکايتونه هم لري.
دولت ساز ټاکنيز ټيم داسې ویلي ((موږ د افغانستان د ټاکنو د خپلواک کمیسیون څخه د ۱۳۹۸کال د ولسمشرۍ ټاکنو د ترسره کولو په خاطر مننه کوو، خو تر څنګ یې مشخص شکایتونه هم لرو.))
د ټاکنو خپلواک کمېسيون چارواکي له اوږده ځنډ وروسته بلاخره یکشنبه په دې وتوانېدل، چې لومړنۍ پايلې اعلان کړي او د خلکو صبر پای ته ورسوي.
