د ملګرو ملتونو د بشري مرستو همغږي کوونکي مارتین ګریفیتس ویلي، یاد سازمان له خپلې بېړنۍ بودیجې د افغانستان په ګډون ۱۴هېوادونو کې له اړمنو سره د مرستې لپاره ۱۲۵ میلیونه ډالره ځانګړي کړي.
ګریفیتس په خپله ایکس پاڼه کې لیکلي، په داسې حال کې چې د دغه سازمان ډېری مرستندویه ادارې د بودیجې له کمښت سره مخ دي، دوی دغه پیسې د خلکو د اړتیاوو پوره کولو لپاره ځانګړې کړي.
ګریفیتس ویلي، له يادو پيسو يې ۲۰ میلیونه ډالر د افغانستان او ۲۰ میلیون نور د یمن لپاره ځانګړې کړي دي.
هغه زیاته کړې:« په داسې حال کې، چې خلک بشردوستانه مرستو ته اړتیا لري، زموږ ټولې ادارې د بودیجې له کمښت سره مخ دي. موږ په ۱۴ هېوادونو کې د خلکو د ژوند ژغورلو لپاره له خپلې بېړنۍ بودیجې څخه ۱۲۵ میلیونه ډالره ځانګړې کړي.»
د اقتصادي چارو کارپوهان په اوسني وضعیت کې د هېواد د اړمنو خلکو ژغورنې په هدف دغه مرستې مهمې بولي او ټېنګار کوي چې د مرستو وېش ته باید جدي پاملرنه وشي.
د اقتصادي چارو شنونکی سيد مسعود وايي:« زما په نظر دا ښه خبر دی، چې د ملګرو ملتونو سازمان له نورو هېوادونو د مرستو ترلاسه کولو پرته خپله کولی شي له هېوادونو سره مرسته وکړي. په کمک کېدونکو هېوادونو کې موږ هم شامل یو، که څه هم دا ځورونکې خبره ده، چې موږ تل د هغو هېوادونو په ډله کې یو چې باید مرسته را سره وشي؛ خو بیا هم د افغانستان د خلکو ژغورنې او مرستو لپاره ښه خبره ده او مهمه دا ده، چې دا مرستې دوی ته ورسېږي. د دې لپاره باید د وېش بڼه بدله کړو، ځکه تر ډېره ستونزې په مرستو کې نه وي، بلکې د وېش بڼه ستونزه لري، له کومو کړنلارو چې کار اخېستل کېږي ټولې زړې کړنلارې دي.»
له بلې خوا یو شمېر نور کارپوهان بیا وايي،د کاري فرصتونو نشتوالی، بې وزلي او د کورنیو کمزوری اقتصاد هغه عوامل دي چې د بشري ناورین کچه یې لوړه کړې.
د اقتصادي چارو شنونکی حمدالله همدرد وايي: « د نړیوالو سازمانونو توجو ته ډېره اړتیا ده، چې باید افغانستان کې ورته پاملرنه وکړي او له افغانانو سره مرسته وکړي. د دې ترڅنګ اوسنۍ سرپرستې ادارې ته هم په کار ده، چې د افغانانو دغه بشري ناورین ته پاملرنه او رسېدنه وکړي.»
د اقتصادي چارو شنونکی شبیر بشیري وايي:« له نېکمرغه په افغانستان کې ناورین تر هغې کچې ژور نه دی څومره یې چې د ملګرو ملتونو د سازمان دفترونه څرګندوي؛ خو په ټوله کې نه شو کولی چې له اقتصادي ناورین، بېکارۍ، فقر او د ښه ژوند نشتوالی او غوره ده کموالی ورته ووایو.؟
ملګري ملتونه په داسې حال کې له افغانانو سره د ۲۰ میلیونو ډالرو مرستې اعلان کوي، چې د خوړو نړیوال پروګرام تازه د بودیجې کمښت له امله له میلیونونه اړمنو افغانان سره د مرستو بندولو خبرو ورکړی دی.
