د خوړو نړیوال پروګرام ( ډبلیو.اېف.پي) وايي، اوس مهال په افغانستان کې ۹۰ سلنه کورنۍ پوره خواړه نه لري.
د یاد پروګرام په خبره، ډېری کورنۍ له فقر سره مخ دي او نشي کولی چې د ژوند تېرولو لپاره ځان ته کافي خواړه برابر کړي.
د خوړو نړيوال پروګرام د هغو زرګونو ماشومانو په تړاو هم انديښنه ښودلې، چې د کافي خوړو نه لرلو باجود هم د زدهکړو په موخه ښوونځيو ته ځي.
یاد پروګرام زیاتوي:« په افغانستان کې له هرو ۱۰ کورنيو ۹ هغه یې کافي خواړه نه لري، زدهکوونکي په تش نس ښوونځیو ته ځي او دا ډېره ستونزمنه ده چې په لوږه دې زدهکړې وشي.»
د اقتصادي چارو یو شمېر کارپوهان ټېنګار کوي چې سرپرست حکومت دې د فقر مخنيوي لپاره پر يوه داسې مکانېزم کار وکړي چې له مخې يې افغانانو ته کاري فرصتونه برابر او په خپل توان ځان او کورنۍ ته خواړه چمتوو کړي.
په ورته وخت کې د اقتصاد وزارت مسلکي معین عبدالطیف نظري وايي، په هېواد کې د فقر مخنيوي په موخه لنډ مهالي او اوږد مهالي پلانونه تر لاس لاندې لري او هڅه کوي چې د لويو پروژو په پیلولو سره به د فقر او بېرزوګارۍ مخنیوی وکړي.
نظري زیاتوي:« اسلامي امارت د فقر ریښو له منځه وړلو او د افغانستان د خلکواقتصادي ژوند د ښه کېدو لپاره ستراتیژیک پلانونه لري. د لویو اقتصادي پروژو پر لاره اچول، د پانګونې جلبوجذب او د پراختیايي او پرمختیايي پروژو ملاتړ د هېواد د اقتصادي ودې او پراختیا په موخه دي.»
له دې وړاندې د بشري مرستو همغږۍ ادارې (اوچا) ويلي ول چې په افغانستان ۲۹ ميليونه خلک له فقر سره مخ دي او له نړيوالو يې غوښتې چې په دې سختو شرایطو کې د افغانانو لاسنيوی وکړي.
