کورنيو چارو وزارت د بشري حقونو نړیوال سازمان هغه څرګندونې بې اساسه بولي، چې په کابل ښار کې يې د امنيتي کمرو د نصولو په تړاو کړي دي.
دې سازمان په يوه بيان کې په کابل کې د امنيتي کمرو ځای پر ځای کول د افغانانو له اساسي حقونو سرغړوی بللی او ويلي يې دي، چې دا کار د خلکو جدي تعقيب په موخه کېږي.
خو د کورنيو چارو وزارت ویاند عبدالمتین قانع دا کار د امنيت ټينګښت لپاره يوه اړتيا بولي او زياتوي، چې د امنيتي کمرو لګول په نورو هېوادونو کې هم معمول دي.
قانع زیاتوي: « له بده مرغه ځېنې نړیوال سازمانونو، لکه د بښنې نړیوال سازمان غبرګون ښودلی چې محدودیت وضع کول د بشر له حقونو سرغړونه ده، دا بیخي بې اساسه ده، حقیقت نه لري. موږ دا کار یوازې د امنیت د تامین په موخه کړی او ورته وخت کې هېوادوال زموږ له دې کاره خوښ دي. دا ډېر مثبت رول لري د امنیت په برخه کې او د جرمونو کچه یې کمه کړې.»
قانع وايي، حکومت د یوه څلور کلن پلان له مخې د جنایي او امنیتي پېښو مخنیوي لپاره د کابل په شمول د ولايتونو ګڼې ګوڼې ځايونو، هوايي ډګرونو، سوداګريزو بندرونو او ګمروکونو کې امنیتي کمرې لګوي.
هغه زیاتوي: « له بده مرغه چې په تېر نظام کې هم دلته بالنونه وو، د افغانستان په خاوره کې استفاده کېدل په کابل او نورو زونونو کې؛ نو هغه وخت د بښنې نړیوال سازمان نه وه. زما غوښتنه له نړیوالو سازمانونو څخه دا ده، چې د افغانستان ځمکني حقایق دې وګوري نور نړیوال دې وګوري، چې هغوی کمرې نصبوي چا نیوکه پرې ونه کړه؛ نو بیا ولې په افغانستان نیوکه کېږي؟ اسلامي امارت د ولس ټولو حقوقو ته ژمن دی، امنیت تامینولو ته ژمن دی او په دې اساس موږ هر ډول اقدم کوو، هېوادوال دې خوښ وي او امنیت تامین دی.»
بل خوا د کابل ښاريان که څه هم د امنیتي کمرو لګول د خلکو په کټه کڼي، خو په شخصي لګښت په کوڅو له عامو خلکو د کمرو لګولو پر غوښتنې نيوکه کوي.
دوی زياتوي، د بېروزګارۍ او خراب اقتصادي وضعيت له امله نه شي کولی، چې د امنيتي څار لپاره په شخصي لګښت کمرې واخلي او نصب يې کړي.
د کابل ښار یو تن اوسېدونکی قدوس وايي: « مثبت ګام دی، خو زه وایم که چېرې دولت دې ته بودیجه ځانګړې کړي نو زه فکر نه کوم چې دومره شي، ۵۰۰ افغانۍ چې د کور په سر اخلي، هغه بودیجه دې د کال په سر کې دې ته ځانګړې کړي.»
د کابل ښار یو بل اوسېدونکی احسان الله وايي: « دغه د کارت نو ساحه ده، په دې ساحه کې خلک د مازیګر له لمانځه ها خوا نه شوای ګرځېدای، ځکه په دې لاره کې رقم رقم خلک راوتل، خلک لوټل کېدل، خلک وژل کېدل.»
د کابل ښار اوسېدونکی نصیب ګل مومند بیا وايي: « دا ډېر ښه کار دی. دا کمرې چې ولګېږي زموږ او تاسې لپاره؛ نو غلاوې به ورکې شي، چور چپاول به ورک شي، ډېره ښه نتیجه به ورکړي. دا چې په جلال اباد کې هم نصب شي په کابل کې هم او هر ولایت کې نصب شي دا ډېر ښه کار دی، ځکه د غلاوو مخنیوی به وشي.»
خو د کورنیو چارو وزارت بیا دغه کنګوسې ردوې چې ګواکې له خلکو یې غوښتې، چې د کمرو په لګولو کې مالي سهم واخلي.
وزارت وايي، د کمرو له لارې د امنيتي څار زياتولو په موخه به په نږدې راتلونکې کې له ځينو هېوادونو سره د تخنيکي همکارۍ په موخه قراردادونه هم لاسليک کړي.
