د ریاست الوزراء سیاسي مرستیال مولوي عبدالکبیر د اسلامي همکاريو سازمان (او.آی.سي) د علماوو له پلاوي سره په سپېدار ماڼۍ کې لېدلي دي.
ارګ پر خپله ټویټرپاڼه لیکلي، په دې کتنه کې د اسلامي همکاریو سازمان اپلاوي غړو ويلي، اسلامي هېوادونه په افغانستان کې دایمي ثبات غواړي او د جګړې پلوي نه دي.
دوي دغه رزا په افغانستان کې د داعش وسله والې ډلې پر وړاندې د سرپرست حکومت مبارزه هم ستايلې ده.
د اسلامي همکاريو سازمان د علماوو پلاوی:« اسلامي نړۍ د افغانستان تلپاتې ثبات غواړي او د جګړې پلوي نه ده. په افغانستان کې د داعش پر وړاندې د اسلامي امارت مبارزه بې سارې او اغېزناکه ده او پر دغو پرمختګونو باید نړۍ اعتراف وکړي.»
په دې ليدنه کې د رياستالوزرا سياسي مرستيال مولوي عبدالکبیر ويلي، په افغانستان کې جګړه پاې ته رسيدلې او افغانستان د مرکزي حکومت په لرلو د سيمي او نړۍ له هېوادونو سره په مثبت تعامل ولاړې اړيکې غواړي.
عبدالکبیر زیاته کړې:« په افغانستان کې جګړه ختمه شوې. ژبني، قومي او مذهبي نفاق ته ځای نشته او افغان خاوره د قوي اسلامي نظام له لوري اداره کېږي. اسلامي امارت له ټولو هېوادونو سره مثبت تعامل غواړي او اوس مهال اسلامي امارت د سالم سیاست له امله افغانستان له یو شمېر دولتونو سره ښې سیاسي او تجارتي اړیکې لري.»
د اسلامي همکاريو سازمان که څه هم په کابل کې د خپل پلاوي د لېدنو جزئیات نه دي رسنيز کړي، خو پر خپله ټویټر پاڼه کې يې ليکلي، چې د اسلامي همکاريو سازمان د علماوو پلاوي ناستې به دوام ولري او پر هغو اندېښنو به بحث او خبري وکړي، چې د بهرنيو چارو وزیرانو د شورا په پرېکړو کې مطرح شوې وې.
یاد سازمان زیاته کړې:« تمه ده چې د اسلامي همکاريو سازمان د علماوو پلاوی د حکومت له چارواکو سره په بېلابېلو موضوعاتو او د بهرنیو چارو وزیرانو د شورا په اړوندو پرېکړو کې د مطرح شویو اندېښنو په اړه کتنو ته دوام ورکړي.»
د نړیوالو اړیکو کارپوهان بیا وايي، افغانستان ته د ياد پلاوي راتګ له ځينو هغو انديښنو سره تړلی، چې د اسلامي همکاريو سازمان غړي هېوادونو يې له سرپرست حکومت څخه د ځوابولو په لټه کې دي.
د اسلامي همکاريو سازمان د علماوو پلاوی تېره پنجشنبه کابل ته راغلی او تر دې مهاله يې د بهرنيو چارو له سرپرست وزیر مولوي اميرخان متقي او د رياست الوزرا له سياسي مرسيتال مولوي عبدالکبیر سره لېدلي دي.
