افغان ځواکونو په ارزګان کې د طالبانو یو زندان مات کړی.
د ملي دفاع وزارت له لوري په یوې خپرې شوې اعلامیه کې راغلي چې افغان ځواکونو د ځانګړو عملیاتو په مهال د ارزګان شهید اساس ولسوالۍ کې د طالبانو له زندان څخه ۱۲ بندیان ازاد کړي دي.
د ژغورنې په دغو عملیاتو کې درې طالبان وژل شوي، پنځه کسان یې نیول شوي او د هغوی د مهماتو یوه کوچنۍ زېرمه هم له منځه وړل شوې ده.
دا چې خوشي شوي ملکي وګړي او که امنیتي سرتیري دي ، په اړه یې ملي دفاع وزارت څه نه دي ویلي.
وړاندې له دې هم په هلمند، کندهار او دهېواد په شمالي ولایت کندز کې افغان ځواکونو د طالبانو له زندانونو بندیان ازاد کړي چې د ملکي وګړو سربېره، دولتي مامورین او د پوځ او پولیسو سرتیري هم په کې شامل وو.
طالبانو تر اوسه په دې اړه څه نه دي ویلي.
