طالبان له خپل مشرتابه سره په مشورو بوخت دي.
د طالبانو سیاسي دفتر وايي، دوی له خپل مشرتابه سره په مشورو بوخت دي او امریکا سره یې خبرې به بېرته ژر پیل شي.
معتبرې سرچینې وايي، طالبان له خپل مشرتابه او نظامي مسولینو سره د تاوتریخوالي په راکمېدو سلا مشورې کوي.
خلیلزاد بېرته له اسلام اباد قطر ته رسېدلی او موثقو سرچینو د خلیلزاد له خولې ویلي، چې روانه اوونۍ به دوی د لوی بدلون هوکړه وکړي.
د طالبانو سیاسي دفتر وايي، دوی له خپل مشرتابه سره په یو لړ مشورو بوخت دي او بېرته خبرو ته راګرځي.
سهیل شاهین د مشورو موارد روښانه نه کړل خو معتبرې سرچینې وايي، مذاکراتي پلاوی له خپلو نظامي مسولینو سره د تاوتریخوالي په کمېدو خبرې کوي.
زلمی خلیلزاد هم په دې لټه کې دی چې تاوتریخوالی کم شي، او په همدې تړاو یې اسلام اباد ته په سفر کې له پاکستاني چارواکو سره هم خبرې کړې دي.
زلمی خلیلزاد شنبه بېرته قطر ته رسېدلی، هلته یې ځینو کسانو ته ویلي، چې امریکا به په روانه اوونۍ کې د لوی بدلون هوکړه وکړي.
زلمي خلیلزاد دا خبرې د پاکستان له سفر وروسته کړې دي او ممکن شنبه ناوخته کابل ته راستون شي.
د افغان سولې په برخه کې د امریکا استازی زلمی خلیلزاد داسې وايي (( په اسلام اباد کې له بهرنیو چارو وزیر شاه محمود قریشي او پوځ مشر قمر باجوه سره په لیدنه کې مې د سولې د روانو خبرو په اړه مالومات شریک کړل او په افغانستان کې د تاوتریخوالي په راکمولو او اوربند کې مو د هغوی د ملاتړ هرکلی وکړ. دا چاره به بین الافغاني مذاکراتو ته لار هواره کړي))
د ځینو راپورنو په اساس طالبان او امریکایانو یو او بل په تاوتریخوالي تورنوي، خلیلزاد له طالبانو غوښتي چې بریدونه کم کړي او دغه راز د طالبانو غوښتنه له امریکا دا ده چې شپني عملیات او هوايي بریدونه کم شي.
افغان حکومت هم د تاوتریخوالي کموالي او اوربند ته په تمه دی.
د ولسي جرګې ځینې غړي ټینګار لري چې خلیلزاد باید له دوی سره په مشوره مخکې لاړ شي .
امریکا او طالبان تر بل هر وخت خبرو ته نیږدې ښکاري، د تازه او تېرو خبرو اصلي موضوعات مالوم دي خو د جزيي موضوعات چې روښانه شوې نه دي، تر بحث لاندې و.
