د افغان سولې لپاره د امریکا ځانګړی استازی اسلام اباد ته تللی دی.
افغانستان کې د سولې لپاره د امریکا ځانګړی استازی زلمی خلیلزاد پاکستان ته تللی.
زلمي خلیلزاد اسلام اباد کې د پاکستان د بهرنیو چارو له وزیر شاه محمود قریشي او د پوځ له مشر قمر جاوید باجوا سره کتلي دي.
درې واړو په جلا جلا کتنه کې د سیمې پر وضعیت او افغانستان کې د سولې په تړاو خبرې کړي دي.
د پاکستان د بهرنیو چارو وزارت ویلي، خلیلزاد د پاکستان د بهرنیو چارو له وزیر شاه محمود قریشي سره کتلي او په افغانستان کې یې د سولې او په سوله کې یې د پاکستان پر رول خبرې کړي دي.
د پاکستان د بهرنیو چارو وزارت لخوا په خپره شوې خبرپاڼه کې د شاه محمود قریشي له قوله لیکل شوي چې، پاکستان به افغانستان کې د سولې هڅو اسانتیاو ته دوام ورکړي.
اسلام اباد ته د خلیلزاد سفر په داسې حال کې دی چې په قطر کې یې له طالبانو سره د سولې خبرې د لنډې مودې لپاره ودرولې.
