د کندهار ولایت ښاروالۍ ویاند سیف الله عاصم وايي، د کندهار ښار او ۱۵ ولسواليو کې د بيارغونې د ٣١ پروژو کار روان دى.
د عاصم په خبر، له یادو پروژو ١٦ يې د ښاروالۍ د ٣٥٣ ميليونه افغانيو په لګښت او ١٥ نورې يې د ۲.٢ ميليونه افغانيو په لګښت د همکارو موسیساتو له لوري تمویل کېږي.
هغه زیاتوي:« کندهار ښاروالۍ په روان ۱۴۰۲ کال کې ۳۱ سترې پروژې پیل کړي دي. په دغو ۳۱ سترو پروژو کې ۱۶ پروژې د کندهار ښاروالۍ په مالي لګښت مخې ته روانې دې او ۱۵ پروژې د موسسو په مرسته پرمخ روانې دي.»
په ورته وخت کې سیف الله عاصم وايي، په دغو پروژو کې ۷۰۰۰ کسانو ته د کار زمینه برابره شوې ده.
بل پلو په دغو پروژو کې پر کار بوخت کسان وايي، که څه هم د دوی عاید کم دی، خو د خراب اقتصادي وضعیت له امله په همدې پیسو بسنه کوي.
د پروژې یو تن کارکوونکی وايي:« دوه درې میاشتې مخکې زه بېکاره وم، درې میاشتې کېږي د دې سړک پروژه چې شروع شوې داخل شوی یم او بس دا څه موده کېږي کور ته حلاله روزي پیدا کوم.»
اخوا ښاریان بیا شکایت کوي چې د پروژو کار په ځنډ روان دی او دوی ته یې زیان پیښ کړی.
دوی وایې، پروژې بايد پر ټاکلي وخت پلې شي، ترڅو د خلکو کاروبار ته زیان ونه رسیږي.
د کندهار ښار یو تن اوسېدونکی وايي:« له حکومته مو دا غوښتنه ده چې دا سړک دې ژر جوړ کړي، زموږ کارونه له دې سره خراب دي.»
د کندهار ښار یو بل اوسېدونکی بیا وايي:« دا زموږ هېواد دی. دېر ښه دی چې سړک یې جوړ شي خو دا یوه خبره ده چې درې یا څلور میاشتې کېږي کار یې شروع شي او بیا بېرته نیمايي کې پاتې شي.»
دا په داسې حال کې ده، چې د کندهار ښاروالۍ مسوولين يادې پروژې لويې ګڼي او وايي، د کارونو بشپړېدو ته يې ډېر وخت اړتیا ده.
