د امریکا او طالبانو له توافق وروسته به دا ځل اوربند رامنځته کېږي.
د جګړې ښکېلو خواوو چمتوالی نیولی، چې هوکړې ته له رسېدو وروسته به اوربند رامنځته شي او له افغان حکومت سره به بین الافغاني خبرې پیل شي.
تحلیل دا دی، چې د سولې هړکړه پخوا نهايي شوې چې اوربند یې یوه برخه ده او اوس اړتیا ده چې هوکړه وشي.
د ولسي جرګې غړي بیا د سولې هغه خبرې بې پایلې بولي، چې افغانان په کې شامل نه وي.
افغانستان ته د امریکا د ولسمشر له سفر وروسته طالبانو ویلي، که له امریکا سره هوکړې ته ورسېږي سملاسی اوربند کوي.
اوس چې د طالبانو او امریکا هوکړه نهايي شوې او لاسلیک یې پاتې دی، باور دا دی چې هوکړه کې اوربند او بین الافغاني خبرې شته.
د خلاصون لار شورا مشر سید اکبراغا داسې وویل (( هغه هوکړه ترتیب شوې او وروستي کېډو ته نږدې ده، طالبانو هم ویلي، چې امریکا سره له هوکړې امضا کولو وروسته به اوربند اعلان کړي زما په نظر دا پر ځای پرېکړه ده.))
له دې سره پاکستان یو ځل بیا ژمنه کړې چې افغان سولې او بيا پخلاينې پروسه کې به اسانتياوې رامنځته کړي.
د پاکستان د بهرنيو چارو وزير شاه محمود قريشي داسې وویل ((پاکستان له ټولو خواوو سره په همغږۍ هڅه کوي، افغان سولې او بيا پخلاينې پروسه کې اسانتياوې رامنځته کړي. پاکستان له ټولو احزابو غواړي چې په دې پروسه کې رغنده ونډه واخلي.))
لکه د افغان حکومت په څېر د ولسي جرګې ځینې غړي هم ورته نظر لري او ټینګار لري چې د سولې د مذاکراتو لپاره اوربند شرط دی.
د امریکا ولسمشر افغانستان ته د سفر پرمهال تمه ښودلې وه چې د سولې د خبرو له بیا پيل سره به اوربند رامنځ ته کیږي، خو طالبانو په رسمي ډول د ټرمپ په سفر او څرګندونو تبصره نه ده کړې.
