د کورنیو چارو سرپرست وزیر سراج الدین حقاني ارزګان ته د سفر په لړ کې له قومې مشرانو او دینې علماوو سره لېده کاته کړي دي.
حقاني د افغانستان او هېوادونو ترمنځ د تعامل پڅ وضعيت ته په کتو، له نړۍ سره د تقابل پر ځای پر رغنده تعامل ټينګار کړی دی.
حقاني که څه هم د کوم هېواد نوم نه دی ياد کړی ، خو په خبره یې حکومت له هغو هېوادونو سره هم د سالم تعامل غوښتونکی دی، چې په تېر کې يې پر افغانستان تېری کړی.
هغه زیاتوي:« که اټوم بم ولرې، که ۵۲ ډوله الوتکې ولرې او کروز ولرې خو زما له عقیدې قوي نه دي. خدا (ج) دې عقیده نه را خرابوي. خو دا چې د انسانیت او بشریت شعار ورکوې، په هغې راسره ولاړ شه. »
د ارزګان ځايي مسوولینو، قومي مشرانو او علماوو سره لیدنه کې ځايي خلکو د کورنیو چارو سرپرست وزیر سره خپلې ستونزې شریکې کړې دي.
ځايي خلک وايي، د ارزګان- کندهار ویجاړ سړک د بیا رغونې سربیره یې له تللي پلاوي غوښتي چې د تعلیم او صحت برخه کې شته ستونزې حل کړي.
د اروزګان یو تن اوسېدونکی وايي:« اروزګان ولایت کې دا ۲۰ کاله جنګونه ول او دلته کار شوی نه دی. خلکو ډېرې غوښتنې درلودې، په لیکلې بڼه یې غوښتنې ورته راوړي دي. یوه لویه غوښتنه چې موږ درلوده ، هغه د اروزګان او کندهار لویه لاره ده چې دی (حقاني) هم خپله پر دې لاره راغلی دی. »
حقاني چارواکو ته د سپارښتنې په توګه ویلي چې د خلکو ستونزو ته پر وخت رسېدنه وکړي او دغه راز د امکاناتو له محدویت سره سره يې ډاډ ورکړی، چې د ابادۍ په برخه کې به د ولس غوښتنې پوره شي.
سراج الدین حقاني دا څرګندونې داسې مهال کوي چې څو ورځې وړاندې یې د افغانستان خپلواکۍ بېرته ګټلو ۱۰۴ مې کلیزې په نمانځغونډه ویلي ول چې نړۍ دې د فشارونو پر ځای له اسلامي امارت سره شته ستونزې د خبرو له لارې حل کړي.
