امریکا دداعش پر وړاندې د افغان ځواکونو مبارزه ستاېلې.
امریکا وایي افغان پوځ دداعش پر وړاندې رښتینی پرمختګ کړی دی.
د جنوبي او مرکزي اسیا په چارو کې د امریکا د بهرنیو چارو وزارت ځانګړې استازې آلیس ویلز په یوه ټوېټ پیغام کې ویلي، له افغانستان راپورونه ښيي چې دداعش خراسان څانګه له منځه تللې ده.
د ویلز په باور افغان ځواکونو دداعش پر وړاندې رښتینی پرمختګ کړی دی او د دوی پراخ عملیات ددې سبب شوي چې لسګونه داعش جنګیالي افغان ځواکونو ته تسلیم شي.
ویلز وايي سره له دې چې په ننګرهار کې دداعش مهم مرکزونه له منځه تللي خو بیا هم ټولو ته په کار ده چې وېښ وي او ددغې ډلې د فعالیتونو مخه ونیسي.
همدا تیره ورځ د ملي دفاع او کورنیو چارو سرپرست وزیران او په افغانستان کې د ناټو ځواکونو عمومي قومندان د ننګرهار اچین ولسوالۍ هغو سیمو ته لاړل چې تازه له داعش وسله والو نیول شوي دي.
