د زمري یا اسد ۲۸ مه نېټه ده د افغانستان خپلواکۍ بېرته ګټلو له ۱۰۴مې کلیزې سره برابره ده.
پوره ۱۰۴ کاله وړاندې د وخت واکمن عليحضرت شاه غازي امان الله خان انګريزي ښکېلاک ته د افغان ویاړلي ملت په زور ماته ورکړه او خپله خپلواکي یې اعلان کړه.
د اسلامي امارت د رهبرۍ غړو او د تېر جمهوري نظام ګڼو سیاستوالو او چارواکو د خپلواکۍ د ۱۰۴ مې په مناسبت په خواله رسنیو کې افغانانو ته مبارکي ويلې ده.
پخواني ولسمشر حامد کرزي په همدې تړاو خپاره کړي پیغام کې د پایداره سولې او ثبات هېله څرګنده کړې او ټینګار يې کړی، چې د نورو له محتاجۍ د خلاصون لپاره تعليم او تحصيل اړین دی.
کرزي له سرپرست حکومت د دې تاریخي ورځې په مناسبت غوښتنه کړې چې ژر تر ژره دې د نجونو پر مخ د ښوونځیو او پوهنتونونو بندې دروازې پرانېزي.
کرزي زیاته کړې:« په دې تاریخي ورځ یو ځل بیا له د اسلامي امارت له سپرست حکومت غواړم چې ژر تر ژره دې د ښوونځیو او پوهنتونونو دروازې د نجونو پر مخ پرانېزي او په ټول هېواد کې دې د تعلیم او زده کړو زمینه برابره کړي، تر څو د نورو له محتاجۍ د واقعي خپلواکۍ لرونکو په توګه خلاص او یو پر ځان بسیا هېواد شو.»
سياستوال او لېکوال عبدالکریم خرم د دې ورځې په مناسبت خپاره کړي پیغام کې تېرو ناخوالو ته اشاره کړې او ويلي يې دي چې د افغانستان په تاریخ کې ټول تور یا ټول سپین نه دي او ټيڼګار يې کړی چې نور بايد خپل تاريخ ته په اننقادي نظر وګورو.
خرم زیاتوي:« دغه ویاړ او وروستیو ناخوالو ته په کتو موږ باید خپل تاریخ په انتقادي نظر وګورو. په تاریخ کې ټول تور یا ټول سپین نه دي.»
پر نورو پخوانیو چارواکو او سیاستوالو سربېره د اسلامي امارت د رهبرۍ غړي انس حقاني د زمري ۲۸مه د وياړونو ډکه او د افغانستان د تاریخ لپاره زرينه بللې ده.
حقاني زیاته کړې:« نن له بریټانیا د سیاسي استقلال د اعادې ورځ ده، افغان مجاهد ولس ته دې مبارک وي. د زمري ۲۸ مو د نیکونو یادګار دی چې زموږ د تاریخ طلایي برخه جوړوي.»
پوره ۱۰۴ کاله وړاندې د زمري پر ۲۸ مه د هېواد زړهور ولس په خپل ملي اتحاد او اتفاق ټينګ عزم، لوړ همت او د سر په قربانيو د وخت ښکېلاکګر قووت ته ماتې ورکړه او شاه غازي امانالله خان د هېواد بيا خپلواکي اعلان کړه.
