د رسمیت پيژندنې لپاره کابل ته د نړۍ له لوري وړاندې شوي شرایط لاهم نه دي پوره شوي او په دغه برخه کې نور هم جدیت رامنځ ته شوی دی.
خو له بل لوري بیا د افغانستان حکومت تل ټینګار کړی دی چې له ټولې نړۍ سره د ښو او په متقابل درناوي ولاړو اړیکو غوښتونکی دی او د رسمیت پيژندنې لپاره یې ټول معیارونه هم پوره کړي دي .
د بهرنیوچارو وزارت سرپرست مولوي امیر خان متقي وايي، د فشار سیاستونه ناکامه شوي او اوس د دې وخت دی چې باید تعامل ته سره ورسیږو او په خبره یې افغانستان د سیمې په امنیت کې مهم رول ولوبوي.
متقي زیاتوي:« نور باید له افغانستان سره مثبت تعامل وشي. کوم فشارونه چې وکارول شول، کوم تبلیغات چې د افغانستان ولس او مجاهدینو پر ضد وشول، هغه ټول ناکامه شول. نو کامه افشنونه کارول د ناکامه خلکو کار دی. »
د سیاسي چارو تحلیل کوونکي بیا وايي، د تېرو دوه کلونو تجربو وښووله چې فشارونه او بندیزونه یوازې له عامو افغانانو قرباني اخلي او ژوند یې سخت کړی دی.
دوی وايي، تعامل ته د رسیدو لپاره باید مذاکرات پیل شي او د ستونزو حل او د بې باورۍ له منځه وړلو یوازینۍ حل لاره خبرې دي چې باید دواړه لوري ورته کېني.
دغه راز دوی وايي، غوښتنه یې داده چې نړۍ باید د افغانستان اوسني نظام پر وړاندې خپل دریځ نرم کړي او اسلامي امارت دې د خپلو ولسونو ستونزو حل لپاره انعطاف وښي.
د سیاسي چارو تحلیل کوونکی سرور نیازی وايي:« د سیاسي فشارونو او بندیزونو پر ځای ښه دا ده چې د تفاهم او همکارۍ لاره غوره شي. سیاسي فشارونه پر افغان ملت دي، دا اوس تاسو وګورئ، بې کاري، فقر او لوږه اوج ته رسېدلې ده. نور افغان دې ته اړتیا لري چې په هېواد کې سمون رامنځته شي، کار رامنځته شي، نو سیاسي فشارونه او بندیزونه نه شي کولی حل لاره پیدا کړي.»
د سیاسي چارو تحلیل کوونکی قریب الرحمن شهاب بیا وايي:« هغه څه چې په تېرو دوو کلونو کې تجربه شول، هغه دا دي چې د بندیزونو او فشارونو بیه د افغانستان خلک ورکوي. که دا دوام کوي، نو بیا به هم قرباني د افغانستان خلک وي. پایله یې موږ ګورو، چې خراب اقتصادي حالت دی، بې کاري ده او د شرایطو خرابیدل دي. نو پکار دا ده چې دې اندېښنو او ستونزو لپاره تعامل غوره شي او خبرې اترې وشي. نړۍ هم باید دا کار له اوسنیو حاکمان سره وکړي او اوسني حاکمان هم باید د افغانستان خلکو غوښتنې او ارزښتونه په نظر کې ونیسي او هم داسې معقولې لارې ومومي چې له مخې یې شته ستونزو ته حل لاره پیدا شي.»
ځینې نور بیا په دې باور دي چې د فشارونو سیاست پایله نه ورکوي او نړۍ باید د افغانستان پر وړاندې خپل اوسني دریځ کې بدلون راولي او د تعامل لار غوره کړي.
دوی وايي، د دوحې هوکړې له لاسلیک وروسته تر دې دمه دا ثابته شوې چې افغان لوری خپلو ژمنو ته ژمن دی او اوس نړیوالو ته په کار ده چې په یوه خوله تعامل ته ور وړاندې شي.
له امریکا سره د خبرو لپاره د افغانستان بهرنیو چارو وزارت سرپرست مولوي امیرخان متقي پر مشرۍ یو پلاوی د قطر پلازمېنې دوحې ته رسیدلی دی.
د مالوماتو له مخې، دغه پلاوی به له امریکايي لوري سره په دوه اړخیزو اړیکو او د افغانستان کنګل شوې شتمنۍ خلاصون ، په بانکي سیسټم کې د اسانتیاوو په رامنځ ته کولو او همدا راز د امریکايي الوتکو په وسیله د افغانستان هوايي حریم نقض په تړاو هم خبرې وکړي.
