بریدونه نه شي کولی سولې، هوساینې او پرمختګ ته د رسیدو لپاره زموږ د ملت پیاوړې اراده کمزوري کړي.
ولسمشر محمد اشرف غني نن سهار کابل ښار کې موټر بم برید غندلی او اړوند مسولو چارواکو ته یې لارښوونه کړې چې د پېښې ټپيانو ته د رسیدو لپاره دې خپلې هڅې نه سپموي.
نن سهار شاوخوا اوه نیمې بجې د کابل ښار پنځلسمې حوزې اړوند قصبې سیمه کې د ټي پي جي په نوم د یوې بهرنۍ کمپنۍ پر موټر موټر بم برید وشو چې له امله یې اوه تنه ووژل شول او لس نور یې ټپيان کړل.
کورنیو چارو وزارت لیکلي، برید کې اوه تنه وژل شوي، لس ټپيان دي چې له د ټپيانو په ډله کې څلور هم د یادې کمپنۍ غړي دي.
په وژل شویو او ټپیانو کې ماشومان هم شامل دي.
د پېښې په ځای کې د یادې کمپنۍ یو لنډ کروزر موټر او د ملکي وګړو دوه موټرونه له منځه تلي دي.
دا له نسبي ځنډ وروسته کابل ښار کې موټر بم برید و ، همدا تیره ورځ افغان حکومت د حقاني شبکې او طالبانو اړوند درې مهم کسان هم خوشي کړل.
د کابل ښار موټر بم برید مسولیت تر اوسه کوم لوري په غاړه نه دی اخیستی.
