په پنځلس ولایتونو کې د رای بیاشمېرنې مخه نیول شوې.
په پنځلسو ولايتونو کې د رايو د بېا شمېرنې مخه نيول شوې او که دوام وکړي، د ټاکنو د پایلو د ځنډ امکان زیات دی.
ټاکنو کمېسيون وړاندې ويلي وو چې د دې اونۍ په پنجشنبه به د ټاکو لومړنۍ پاېلې اعلان کړي، خو جنجالونو ته په کتو باور نه کیږي چې پایلې اعلان شي.
د کمېشنرانو نننۍ خبري غونډه د کمېنشر مولانا عبدالله لخوا هغه وخت ګډه وډه شوه چې په غونډه کې يې د اجنډا خلاف موضوعات شريک کړل.
د ټاکنو کمېسيون غړي له څو ورځو ځنډ وروسته په ګډه خبري ناسته کې راڅرګند شول ترڅو خلکو ته د خپل کار راپور ورکړي خو؛ د دې کمېسيون يو غړي مولانا عبدالله د اجنډا خلاف يوناما په غيرمسلکيتوب تورنه کړه چې د ده په اړه د يوناما قضاوت سم نه دی.
د شنبې په ورځ په اتلسو ولايتونو کې د ټاکنو په ولايتي دفترونو کې د رايو بيا شمېرنه پېل شوې خو په پنځلسو نورو ولایتونو کې د ثبات او همپالنې ټیم اجازه نه ورکوي او دفترونه یې ورته تړلي دی.
د کمېسيون غړو يوځل بيا تاکيد وکړ چې د منلو رايې يوازې هغه دي چې په بايوميټريکي معيار برابرې وي.
کمېسیون ډاډه دی چې د چا فشار ته به تسليم نشي او خپل کار ته به دوام ورکوي.
په کابل کې د يوناما دفتر همدا اونۍ په يوه لیک کې د دې کمېسیون غړی مولانا عبدالله په توپيري او بد چلند تورن کړی او په همدې تړاو د کابل يو شمېر اوسېدونکو د ټاکنو کمېسیون مخې ته لاريون وکړ او د هغه د ګوښه کېدو او محکمه کېدو غوښتنه يې وکړه.
خو مولانا عبدالله د يوناما ياد ليک يوه توطيه ګڼلې او ټينګار یې کړی چې دا موضوع به تعقیب کړي.
