د امریکا د پوځ لوی درستیز وايي، کار مو پای ته نه دی رسیدلی ډېر کلونه به په افغانستان کې وو
د امریکا د وسله وال پوځ لوی درستیز جنرال مارک میلي په خپله یوه تازه مرکه کې ویلي، چې ددوی ماموریت تر دې دمه په افغانستان کې نه دی بشپړ شوی.
دده په خبره امریکایي ځواکونه به د څو نورو کلونو لپاره په افغانستان کې وي او هڅه کوي دغه هېواد یو ځل بیا د ترهګرو په ځاله بدل نه شي.
مارک میلي ویلي دوی افغانستان ته ددې لپاره راغلي چې نړیواله ترهګري ختمه کړي او اجازه ور نه کړي چې له دغه ځایه امریکا او یا کوم بل هېواد ته ګواښ پیښ شي.
نوموړي دا نه دي ویلي چې امریکایي ځواکونه به تر څو کلونو په افغانستان کې وي خو په خبره یې تر اوسه ددوی ماموریت نه دی بشپړ شوی.
مارک میلي داسې مهال دغه څرګندونې کوي چې د امریکا ولسمشر ډونالډ ټرمپ بیا له افغانستان د خپلو ځواکونو د ایستلو پلوی دی.
د بهرنیو ځواکونو وتل د سولې لپاره د طالبانو ستر شرط هم دی.
