امریکا وايي، داسې هېڅ شواهد شتون نه لري چې ثابته کړي په پاکستان کې افغان کډوال په ترهګریزو کړنو کې لاس لري.
وروسته له هغې چې تېرو څو ورځو کې پاکستاني چارواکو افغان وګړي په دې هېواد کې په وروستیو ناامنیو او بریدونو کې پر لاس لرلو تورن کړي، اوس د امریکا د ملي امنیت شورا ویاند جان کربي د همدې موضوع په تړاو وايي، چې تر دې دمه هېڅ داسې نښې نښانې او شواهد نشته چې دغسې څه تایید کړي.
نوموړي دغه راز د ډیورند فرضي کرښې هغې غاړې ته په وروستیو وسله والو بریدونو کې د افغان کډوالو لاس لرل رد کړي.
د امریکا د ملي امنیت شورا ویاند جان کربي ویلي:« موږ هېڅ داسې نښې نښانې نه وینو چې څرګنده کړي په پاکستان او د ډیورند فرضي کرښې څنډو کې دې افغان کډوال په ترهګریزو کړنو کې لاس ولري. موږ ګڼ شمېر افغان کډوالو ته د خوندي ځایونو په برابرولو کې د کوربه هېواد په توګه د پاکستان د نه منلو وړ سخاوت څخه مننه کوو او موږ به د ترهګرۍ ضد مشروع ګواښونو او ننګونو په برخه کې له دې هېواد سره خپل ګډ کار ته دوام ورکړو.»
ورته مهال د پاکستان د کورنیو چارو وزیر رانا ثنا الله په يوه ټلوېزيوني مرکه کې پر ټي ټي پي د افغان حکومت د کنترول خبره نه ده منلې او ترڅنګ یې پر دې ټینګار کړی چې د افغان سرپرست حکومت نیت دا دی چې ټي ټي پي په پاکستان کې د بریدونو له ترسره کولو لرې کړي.
شنونکي د پاکستاني ملکي او پوځي چارواکو دغه ډول ضد او نقیضې څرګندونې د ترهګرۍ په تړاو د دې هېواد د ادعاوو خامي او د دوه مخي سیاست روښانه نمونه بولي.
سیاسي شنونکي سلیم پیګیر وايي:« دا پاکستان دی چې تل یې د افغانستان په چارو کې لاسوهنه کړې او کوي یې. پاکستان غواړي په دا ډول ادعاوو سره نړیوالو ته وښيي چې د ترهګرۍ هېڅ پټنځای په پاکستان کې نشته، خو برعکس یې ټوله نړۍ په دې پوهېږي چې ترهګري او پټنځایونه یې په پاکستان کې دي.»
کارپوهان وايي پاکستان تل له افغان حکومتونو سره دوه مخی سیاست کړی او د خپلو مرموزو پالیسیو له لارې یې غوښتي د افغان خاورې له لارې خپلو ستراتېژیکو موخو ته ورسیږي.
دوی پر افغان حکومت غږ کوي، چې د دې هېواد ورته څرګندونو ته جدي غبرګون وښيي او د خپلو خبرو د نه ثبوت او د ورته بې بنسټه ادعاوو د تکرار د مخنیوي په موخه دې له دې هېواد سره دې د نړیوالو اصولو له مخې له دې جدي چلند وکړي.
سیاسي شنونکی نادر افغان څرګندوي:« پداسې حال کې چې د ترورېستانو مرکزونه له څلورو لسیزو راهیسې پاکستان کې وو او پاکستان همدا ډول نیابتي او استخباراتي لوبې پر کار اچولې وې او په ټولو لوبو کې هدف دا و چې افغانستان کې نظامونه ضعیفه کړي، افغانستان کې نظامونو ته سقوط ورکړي، افغانستان کې د ضعیفو نظامونو له کبله ځان ته زیات امتیازات ترلاسه کړي او د افغانستان د ځمکې او فضا له لارې د خپلو ملي منافعو لپاره ګټه ترلاسه کړي.»
دا په داسې حال کې ده چې د پاکستان دفاع وزیر خواجه اصف او د دې هېواد د پوځ لوی درستیز عاصم منیر همدا روانه اوونۍ له اسلامي امارته د ټي ټي پي پروړاندې د جدي اقداماتو غوښتنه مطرح کړې وه او دغه راز یې سرپرست حکومت د دوحې موادو بشپړې عملي کېدا ته رابللی و.
خو اسلامي امارت په پاکستان کې وروستۍ ناامنۍ د امنیت د ټینګښت په برخه کې د پاکستاني پوځ او امنیتي ارګانونو ناتواني بولي، چې په خبره يې اوس دغه هېواد په دې لټه کې دی څو د خپل ضعف پړه پر افغان حکومت ور واچوي.
