مېک وايي پوهنې وزارت په ځینو ښوونځیو نظارت نه لري.
د اداري فساد پر وړاندې د مبارزې د څارنې او ارزونې کمیټې یا میک موندنې ښيي چې پوهنې وزارت پر یو شمېر خصوصي ښوونځیو کنټرول نلري او له اوصولو سرغړونه کوي .
په خصوصي ښوونځیو کې ځینو یې د پوهنې نصاب انګلیسي ته اړولی او زده کوونکو ته یې تدریس کوي.
پوهنې وزارت ستونزه مني او د خصوصي ښوونځيو د شمېر زیاتوالي له کبله نه توانیږي چې ټولو باندې نظارت وکړي.
په ۲۰۱۷ کال کې د فساد پر وړاندې د مبارزې او د څارنې خپلواکې ادارې یا میک ادارې په پوهنې وزارت کې د فساد او بې غورویو موندنې له رسنیو سره شریکې کړې.
هغه سپارښتنې چې دې کميټې پوهنې وزارت ته کړې وې، لږې یې عملي کړي دي.
د میک ادارې رییس میوند روحاني وايي (( ځینو خصوصي ښوونځیو باندې نظارت نشته، ځينو نصاب انګلیسې ته اړولی، ځینې ښوونځي ترمنځ فاصله نه لري، د ځینو فیسونه لوړ دي))
له پوهنې وزارت سره دا موضوعات شریک شوي او پوهنې وزارت منلې چې د ښوونځيو شمېر زیات دی او رسیدګي ورته نه شي کولی.
افغانستان کې اوس تر بل هر وخت زیات خصوصي ښوونځیو باندې پانګونه شوې، خو دوی کې کم شمېر یې په معیار برابر او ښه ښوونیز او روزنیز چاپیریال لري، خو ډیر شمېر نور یې بیا په ټولو معیارونو برابر نه دي.
