افغان حکومت او امریکا په طالبانو غږ کړی چې تاوتریخوالی کم کړي.
ولسمشرۍ ماڼۍ وایي، د طالبانو له اړخه تاوتریخوالی زیات شوی دی خو دوی سولې ته د رسېدو لپاره طرحه لري چې نړیوال به یې ملاتړ وکړي.
خو تحلیل کوونکي وایي، د تاوتریخوالي د کموالي غوښتنه باید یو اړخیزه نه وي او افغان لوری هم باید په جګړه کې کمښت راولي.
کابل کې د امریکا سفیر وروستیو بریدونو ته په اشارې ویلي، یوازې طالبان دي چې په افغانستان کې د سولې مخنیوی کوي.
کابل کې د امریکا سفیر تخار کې پر ماشومانو د ماین چاودنې ته په اشارې ویلي، طالبان د سولې په وړاندې خنډ دي.
کابل کې د امریکا سفیر جان باس ((د بې ګناه ملکي وګړو ژوند اخیستو غندنه کوم چې په پر وړاندې یې په بی پروایۍ سره تاوتریخوالی شوی دی. یواځې طالبان دي چې په افغانستان کې د سولې مخنیوی کوي.))
امریکا طالبانو سره د سولې خبرې د کابل په شش درک کې د یو موټر بم برید په غبرګون کې ودرولې. هغه برید چې د یو امریکایي په ګډون په کې ۱۱ تنه ووژل شول او طالبانو یې مسولیت ومانه.
خو پوښتنه داده چې طالبان به د تاوتریخوالي د کموالي لپاره د امریکا او نړیوالې ټولنې غوښتنه ومني؟
د خلاصون لارې شورا مشر سید اکبر اغا داسې وویل (( زما په فکر باندې دا یو طرفه خبره شوې ده، طالبان سره به یوه اساسي او بنیادي خبره نه وي شوي، زه فکر نه کوم چې طالبان دې د تاوتریخوالي کمولو کې مخالف وي بلکې موافق به وي.))
افغان حکومت هم ویلي، طالبانو بریدونو ته زور ورکړی او تاوتریخوالی یې زیات کړی دی.
د ارګ ویاند یوه خبري کنفرانس کې وویل چې د سولې د خبرو په جریان کې هم طالبانو جګړه بنده نه کړه.
د تاوتریخوالي د کموالي لپاره ټولې هیلې د چین هغې ناستې ته دي چې په دې وروستیو کې جوړیږي. دا ناسته د طالبانو ، سیاسي ډلو او افغان حکومت د استازو ترمنځ جوړیږي چې اوس ځنډول شوې ده.
افغان حکومت وایي، دسولې لپاره پلان لري او نړیواله ټولنه باید د دوی له طرحې ملاتړ وکړي.
امریکا باور لري چې افغانستان کې د جګړې پای سیاسي حل ته اړتیا لري خو له دې هرڅه وړاندې باید تاوتریخوالی کم شي.
