په ټول هېواد کې د ښځو سینګارتونونو د بندولو په اړه د اسلامي امارت وروستۍ پریکړې په کوردننه او بهر غبرګونونه پارولي دي.
په افغانستان کې د ملګرو ملتونو مرستندویه ماموریت (یوناما) د اسلامي امارت د وروستۍ پریکړې د منفي اغیزو په اړه خبرې کړي او له واکمنو چارواکو یې غوښتنې چې د ښځو سینګارتونونو په اړه دې وروستۍ پرېکړه لغوه کړي.
یوناما زیاته کړې:«له حاکمو چارواکو غواړو چې په سینګارتونونو د بندیز پرېکړه دې بېرته واخلي. تازه دا پرېکړه د ښځو پر حقونو او د دوی پر اقتصادي وضعیت منفي اغیزه کوي. دغه اقدام د چارواکو له ملاتړ او هغو ژمنو سره په تضاد کې دی چې دوی له سوداګرو ښځو سره کړې دي. یوناما به د ښځو پر وړاندې د بندیزونو د بېرته اخېستلو هڅه کوي.»
د ښځو حقونو فعالانې بیا وايي، د هرې ورځې په تېرېدو سره پر افغان مېرمنو ډېر فشارونه راوړل کېږي چې د افغان ښځو په ورځني ژوند یې هم منفي اغیزه کړې.
د ښځو حقونو فعاله روح گل افغان وايي:« زده کړې او کار هغه موضوعات دي چې ا.ا پرې محدودیتونه ډېر کړي او په دې دلیل چې ا.ا غواړي څو له دغې لارې په استفادې د خپل قدرت د پايښت لپاره پر نړیوالې ټولنې فشار راوړي.»
اخوا د سیاسي چارو یو شمېر کارپوهان بیا په دې نظر دي چې د اسلامي امارت له لوري د نجونو پر زده کړو او د ښځو کار بندیزونو پرېکړې به د خلکو او دولت تر منځ واټن لا پسې پراخ کړي.
د دوی په خبره، د دې سیاستونو له امله به د نړیوالې ټولنې مرستې هم اغیزمنې شي او وېره شته چې په نړیوال سټېج افغانستان لا نور منزوي شي.
د سیاسي چارو کارپوه عزیز معارج وايي:« د ښځو حقونو او محدودیتونو په تړاو که چېرې ا.ا بدلون رانه ولي او ورځ په ورځ یې نور هم ډېر کړي، نو افغانستان به د منزوي کېدو پر لور وخوځیږي. نړۍ به خپلې مرستې او خدمتونه چې د افغانانو لپاره یې ترسره کوي، بندې کړي. دفترونه به بند کړي. ستونزې به پر ملت راشي. اقتصادي کړکېچ به زیات شي. خلک به له نظام واټڼ پیدا کړي او د طالبانو د نظام سقوط لامل به شي.»
څو ورځې وړاندې د امربالمعروف و نهی عن المنکر وزارت له لوري کابل ښاروالۍ ته په لېږل شوي مکتوب کې د ښځو د سینګارتونونو ټولو کارکوونکو ته یوه میاشت وخت ورکړل شوی دی چې خپل سینګارتونونه وتړي.
دې پرېکړې په کور دننه او بهر غبرګونونه لرل چې په بد اقتصادي وضعیت کې داسې پرېکړه به د زرګونو افغانانو ژوند باندې اغیزه وکړي.
د مالوماتو له مخې، یوازې په کابل کې۱۲زره سینګارتونونه ثبت دي چې زرګونه کسان په کې پر کار بوخت وه او وېره شته چې بندیز سره به دا زرګونه کسان بې دندو او اقتصادي وضعیت به یې نور هم اغیزمن شي.
