ارګ او اجرایه ریاست د داعش ډلې د مشر وژل کیدو هرکلی وکړ.
ارګ د داعش د مشر د وژل کیدو هر کلی کړی او باور یې ښودلی چې د البغدادي وژنه به په افغانستان کې ددغې ډلې فعالیتونه او ګواښونه رامحدود کړي .
ارګ وايي دبغدادي وژنه د افغانستان ترڅنګ د سیمې او نړۍ پر امنیت هم مثبته اغیزه لري .
دامریکا ولسمشر ډونالډ ټرامپ تیره شپه اعلان وکړ چې دداعش ډلې رهبر ابوبکر البغدادي یې دسوریې په ادیلیب ښار کې له منځه وړی دی .
د امریکا ولسمشر ډونالډ ټرمپ داسې وویل (( په تونل کې یوازیني کسان چې پاتې وو د بغدادي کورنۍ وه ، له بغدادي سره یې درې ځوان ماشومان وو، هغوی د تونل اخر ته ورسېدل او زموږ سپیو تعقیبول هغه خپل واسکټ ته چاودنه ورکړه او له ځان سره یې خپل درې ماشومان هم ووژل، چاودنې سره د هغه جسم ټول له منځه ولاړ خو زموږ ټېسټونو ډير ژر هرڅه څرګند کړل او پایله مثبت وه.))
افغان حکومت د امریکايي ځواکونو د هغو عملیات هرکلی کړی چې پایله کې یې د داعش ډلې مشر وژل شوی دی او دا وژنه یې د افغانستان، سیمې او نړۍ د ثبات لپاره مهمه بللې.
اجرایه رییس عبدالله عبدالله بیا هیله مند دی چې د بغدادي په وژل کېدو سره به دغه ډله له خپلو موخو په شاه شي او په فعالیتونو کې به یې محدودیت رامنځ ته شي .
خو د مشرانوجرګې دفاعي چارو کمیسیون بیا باور نه لري چې د بغدادي په وژل کیدو سره دې د دغې ډلې په فعالیتونو کې کموالی راشي .
مسکو چې دواشنګټن سیال بلل کیږي لاهم شک لري چې ابوبکر البغدادي دې وژل شوی وي.
دروسیې دفاع وزارت ویلي تراوسه یې باوري مالومات نه دي ترلاسه کړي دداعش ډلې رهبر دې دسوریې په ادیلیب کې له منځه تلی وي .
