طالبانو منلې چې استازو یې له زلمي خلیلزاد سره یې په قطر کې لیدلي.
طالبانو د یوې اعلامیې په خپرولو سره په لومړي ځل منلې چې د امریکا له استازو سره یې لیدلي او د سولې خبرو په تړاو یې خبرې کړي دي.
طالبانو ویلي چې د امریکا سره به خبرو او غونډو ته دوام ورکړي.
طالب ویاند ذبیخ الله مجاهد ویلي، د دغه لیدنې مشري د طالبانو د قطر دفتر مشر شیر محمد عباس ستانکزي کوله.
د طالبانو اعلامیې ویلي، (( د افغانستان د اسلامي امارت، د سیاسي دفتر مذاکراتي ټیم چې په ترکیب کې یې د سیاسي دفتر رئیس محترم الحاج شیرمحمد عباس ستانکزی، د سیاسي دفتر مرستیال محترم مولوي عبدالسلام حنفي، د سیاسي دفتر اعضاء محترم شیخ شهاب الدین دلاور ، محترم قاري دین محمد حنیف ، محترم الحاج محمد زاهد احمدزی او محترم محمد سهیل شاهین شامل وو، د امریکا مذاکراتي ټیم سره چې مشری یې د افغانستان لپاره د امریکې خاص استازي داکتر زلمي خلیلزاد کوله ، د روان میلادي کال د اکتوبر په ۱۲مه نیټه په دوحه کې وکتل او د افغانستان د مسئلې په سوله ایزحل یې خبرې وکړې.))
مجاهد وایي، له امریکایي استازي سره یې د بهرنیو ځواکونو په وتلو او د افغانستان د مسئلې په سوله ییز حل خبرې کړي.
طالبان وایي، استازو یې د ستونزو د حل او واقعي امن په راتلو کې د بهرنیو ځواکونو شتون لوی خنډ بللی.
د ذبیح الله مجاهد په خبره، افغانستان یو اسلامي هیواد دی، خپل اسلامي ارزښتونه لري، د هغو په پام کې نیولو سره دې د واقعي او افغان شموله حل لپاره هڅې وشي.
د طالبانو یو لوړ پوړي غړي رویټرز ته ویلي، چې دا لومړنۍ ناسته وه او په کې د امریکا استازو په بېلا بېلو سیاسي موضوعاتو خبرې کړي دي.
د طالبانو استازو زیاته کړې چې خلیلزاد له دوی غوښتي چې له ټاکنو د مخه شپږ میاشتینی اوربند اعلان کړي.
ویل کېږي دواړو خواوو د بندیانو خوشې کولو لپاره د کميټو په جوړولو هم خبرې کړي دي.
په پای کي دواړو لوریو موافقه کړې چې خپلو غونډو ته به په راتلونکې کې دوام ورکوي.
