افغان ولسمشر اشرف غني وایي، بهرني ځواکونه باید له افغان حکومت سره په همغږۍ وایستل شي.
نوموړي په خپله تازه مرکه کې ویلي، افغانستان یو مشروع حکومت لري او باید ټول اړخونه دې مسئلې ته درناوی وکړي.
غني ویلي، پر دې خواشینی دی چې امریکا د افغان حکومت له ګډون پرته له طالبانو سره د سولې خبرې مخ ته وړي.
ولسمشر غني یو ځل بیا ټینګار کړی چې طالبان باید د افغانستان له مشروع حکومت سره مخامخ خبرو ته حاضر شي او دا د جګړې د ختمولو یوازینۍ لار ده.
دده په وینا طالبان له نورو هېوادونو سره د خبرو له لارې افغانستان ته ګټه نه شي رسولی او جګړې به لا هم روانې وي.
نوموړي ټینګار وکړ چې حکومت یې د سولې لپاره له هر اقدام ملاتړکوي خو یوازې او یوازې بین الافغاني مذاکرات سوله راوستلی شي.
