د ریاست الوزراء سیاسي مرستیال او کفیل مولوي عبدالکبیر د جمعې پر ورځ د «۱۴۰۲ کال چنګاښ پر ۲مه» په کابل کې د افغانستان لپاره د ملګروملتونو ځانګړي همغږي کوونکي فریدون سینیرلي اوغلو سره کتلي دي.
له ارګه خپره شوې خبرپاڼه کې ویل شوي، په دې کتنه کې اوغلو ویلي، اسلامي امارت د امنیت د تامین، فساد ضد مبارزې او نشه یې توکو د لمنځه وړلو په برخه کې مهم پرمختګونه کړي چې نړیواله ټوله یې قدردانی کوي او چارې یې له نږدې څاري.
اوغلو زیاته کړې چې نړیواله ټولنه غواړي اسلامي امارت سره ښې اړیکې ولري، افغانستان په سیمه کې د ستراتيژيک موقعيت په لرلو سره د سترو سیمه ييزو پروژو په پلي کولو کې مهم رول لري او نړیواله ټولنه په افغانستان کې د داخلي امنیت د ټینګښټ ترڅنګ له ګاونډیو هېوادونو او سیمې سره د ښو اړیکو جوړولو ته ارزښت ورکوي.
اخوا مولوي عبدالکبیر بیا ویلي، افغانستان د ملګرو ملتونو غړو هېوادونو فعال غړی دی او په افغانستان کې د دغه سازمان رول مهم دی او د پیاوړتیا غوښتنه یې کوي.
عبدالکبیر ويلي، اسلامي امارت له نړۍ سره د متقابل احترام په فضاء کې مثبت تعامل غواړي او تمه لري، چې د دې تعامل لپاره لار هواره شي.
دغه راز نوموړي زیاته کړې چې اسلامي امارت ټولګډونه حکومت ته ژمن دی او په اوسني نظام کې د افغانستان د هر قوم او ولایت خلک په لوړو او ټيټو بستونو کې کار کوي.
د عبدالکبیر په وینا، اسلامي امارت هېچاته د دې اجازه نه ورکوي چې د افغانستان خاوره د نورو پرضد وکاروي او په دې اړه شته بې بنسټه ادعاوې په کلکه ردوي.
