د ملګرو ملتونو بشري حقونو سترې کمیشنرۍ مرستیالې ندا ال ناشف افغانستان په نړۍ کې یوازینی هېواد بللي دی چې نجونې په کې شپږم له ټولګی پورته زده کړو ته لاسرسی نه لري.
ناشف زیاته کړې:« افغانستان په نړۍ کې یوازینی هېواد دی چې نجونې په کې له لومړنیو زده کړو بې برخې دي. ښوونه او روزنه، په ټولګیو کې زده کړه او ښوونځي په ټولنو کې، نه یوازې د نجونو لپاره، بلکې د ټولې ټولنې لپاره مهم ده.»
ندا ال ناشف هم مهاله له دې سره پر نړیوالو سازمانونو او ځینو سکتورونو کې د ښځو پر کار بندیز خواشینونکی بولي او وايي، دوام به یې اړمنو افغانانو سره د مرستو رسولو بهیر ټکنی کړي.
ناشف زیاتوي:« افغانستان د نړۍ یوازینی هېواد دی چې د ملګرو ملتونو په ګډون په نړیوالو سازمانونو او همدارنګه له کوره بهر په ډېرو سکتورونو کې د ښځو پر کار کولو بندیز لګوي. دا د ملګرو ملتونو او نورو سازمانونو پر ماموریت باندې د پام وړ اغیزه کوي ترڅو هغو خلکو ته خدمات وړاندې کړي چې له اوږدې بې وزلۍ سره مخ دي.»
د سیاسي چارو شنونکي بیا وايي، د نړۍ او اسلامي امارت ترمنځ واټن به ستونزې نورې هم زیاتې کړي او په خبره یې د اختلاف ټکو او ځینو موضوعاتو حل لپاره باید د سیاسي جوړجاړي ترڅنګ سرپرست حکومت په ځینو پرېکړو کې په بدلون غور وکړي.
اخوا د ملګرو ملتونو امنیت شورا په نیویارک کې د افغانستان په تړاو ناسته لري چې د امنیت، بشري مرستو او روان وضعیت په اړه به په کې ګډونوال بحث او خبرې وکړي.
