بلخ کې ګڼ شمېر مدني فعالانو د ننګرهار وروستۍ پېښه وغندله.
بلخ کې يو شمېر ديني عالمانو او مدني فعالانو د ننګرهار د هسکې مينې ولسوالۍ ترهګريزه پېښه وغندله او له حکومته يې وغوښتل، چې د خلکو د سر او مال ساتلو ته پاملرنه وکړي.
دوی چې د مزارشريف په حسينينه مدرسه کې راټول شوي وو، په جوماتونو بريدونه يې په هيواد کې د مذهبي جګړو د پيل کېدو لپاره دامونه وبلل او له خلکو يې وغوښتل، چې سره متحد و اوسي.
د بلخ دغو اوسېدونکو وويل، چې په هېڅ دين او مذهب کې پر جوماتونو او مذهبي مراسمو بريدونه جواز نلري او هر څوک چې ورته عمل ترسره کوي د دين له دايرې خارج دي.
تېره ورځ د ننګرهار هسکې مينې ولسوالۍ کې د لمانځه پر مهال بريد کې شاوخوا ۷۰ تنه لمونځ کوونکي شهيدان شوي او د ۵۰ شاوخوا هم ټپيان دي.
